《古臣周記－古臣》脫歐去向未明，長建先要面對兩隱憂？

　　又過一個星期，魚缸繼續無咩起色，暫見過２７１０５點逾四個月低位，如果以本月高低位３００８２計，短短一個月唔夠魚缸已經回吐近一成！中美貿易戰暫時未有有進展，但一波未平一波又起。上星期五（２４日）米字國首相梅姨（文翠珊）公布唔撈，令「硬脫歐」機會增加，暫時為止宣布競逐保守黨黨魁同首相地位嘅就有９個人，當中呼聲最高嘅包括早年幾出位嘅前外相約翰遜。
　　如果最後米字國首相由約翰遜接任，有分析師就認為對未來英鎊嘅表現最不利，兌美元可能跌到１﹒２水平，兌港紙就去到９﹒３算！會跌咁多，事關都係因為呢位仁兄就係「硬脫歐」嘅主攻手，佢喺梅姨落台之後，就即刻揚言：「無論有無協議，今年１０月３０日都會『脫歐』。」幾咁有霸氣啊！不過，阿臣仲記得三月份嗰陣，當地國會否決「無協議脫歐」嘅決定，所以啊，唔知呢位「硬脫歐」嘅主力如果真係上台之後會點拆局呢？
　　
＊米字國調高利潤管制，工黨倡公用事業國有化＊
　　
　　講米字國「脫歐」，當然唔少得要講喺當地有業務嘅魚毛，當中大象（００００５）、渣打（０２８８８）就好似對呢件事無咩反應，反而長和系幾隻魚毛，就唔多好睇，其中以壹號仔長和（００００１）為例，公布完業績好過一排上過８４銀之後，一個月之內就試過落返７４銀，認真傷啊！睇睇下現時估值已經去到７﹒５倍ＰＥ，息率都有４﹒２％，算是大平賣，噚日（２８日）配合大成交築起一支陽燭，或者短期可以有一輪反彈？
　　另一隻長建（０１０３８）不論走勢同前景都似乎有暗湧。說話阿臣近排因為要睇「脫歐」資料，無意中發現咗一個對長建未來可能唔太有利嘅消息。
　　說話米字國嘅能源監管機構Ｏｆｇｅｍ，因為當地國會議員指市民被能源公司收取過高收費而有所行動，計劃喺２０２１年後嘅五年內要減免當地市民６０億英鎊嘅能源費用，涉及當地四分一嘅居民！由２０２１年即係下一個規管期開始，會削減當地能源公司回報５０％，約束當地配氣公司同電力公司嘅收費。而且壞消息唔止一個！在野黨工黨最近亦提出一項新動議，希望將公用事業收歸國有，而相關企業會得到米字國國債作為賠償，雖然暫時相關議案仲未通過，不過有買長建嘅缸友可能嚟緊都留意多啲當地新聞啦。
　　睇返長建嘅情況，佢嘅增長一直以收購嚟保持。環顧上年長建喺收購袋鼠國（澳洲）嘅天然氣運輸公司ＡＰＡ集團觸礁，只以２﹒２４億買祖國廣州雲浮市一間水泥廠同三個碼頭泊位設施。上年雖然有風聲傳出長建會將佢喺米字國嘅公用事業上市，但之後就未有任何消息。現時長建喺米字國有水務、污水處理設施、天然氣、鐵路、電網等合共７項投資項目，而最新一份業務就睇到，暫時上年當地溢利貢獻有５２﹒７５億，表現按年持平。而歐洲其他方面就升逾一倍，主要係由收購德國嘅ｉｓｔａ而貢獻。
　　年初長建減持六號仔電能（００００６）２巴仙股權，手持一定啲「茄殊」，加上小超（李澤鉅）都話嚟緊會有大「刁」，可以憧憬好快會有收購消息傳出？不過，由上次收購ＡＰＡ集團同華為被封殺嘅事嚟講，如果當地國家以看待神州嘅態度嚟睇香江，嚟緊長建收購會唔會變得困難呢？大家都要多多留意。睇埋長建個公仔圖，如果以日線圖睇自從三月見６４銀之後就行緊一條下降軌，短期走勢唔太睇好，冀望佢唔會跌穿６０呢個支持位，如果唔係就可能要再跌到５８銀嘅位置。

＊魚缸或有一波反彈，先沽出逆向ＥＴＦ及日清＊
　　
　　講返阿臣個倉。阿臣諗魚缸今個月都跌近一成，好多指標都已經顯示魚缸跌到殘晒，所以嚟緊有機會作一波反彈，所以先將手上嘅逆向ＥＴＦ全數沽出，唔排除之後等位再入。而另一買咗一個星期嘅日清食品（０１４７５），上星期三（２２日）見５銀嘅時間亦首先沽出，儲下彈藥先，暫保留金界（０３９１８）同渣打（０２８８８）坐到中期業績公布。
　
　　表列截至５月２９日（１１：００ａｍ止）投資組合表現：
　　
　　股份　　　　　　股數　　　　　平均買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　金界　　　　　４０００股　　　９﹒６５元　　　　　９﹒０５元　　　３６２００元
　　渣打　　　　　　２５０股　　６７﹒５０元　　　　６７﹒８０元　　　１６９５０元
　　－－－－－－－－－－－－－－－－－－－－－－－－－－－－－－－－－－－－－－－－
　　一周買入╱賣出股份
　　－－－－－－－－－－－－－－－－－－－－－－－－－－－－－－－－－－－－－－－－
　　股份　　　　　　每股作價　　　　數量　　　　計及手續費後金額　　　　　盈╱虧
　　　　　　　　　　　　　　　　　　　　　　　　　　　　　　　　　　　（不計手續費）
　　－－－－－－－－－－－－－－－－－－－－－－－－－－－－－－－－－－－－－－－－
　　賣入：
　　ＦＩ南方恒指　　５﹒５２元　　４０００股　　　　２２０６０元　　　　　８４０元
　　日清　　　　　　５﹒００元　　５０００股　　　　２４９５５元　　　　１８００元
　　－－－－－－－－－－－－－－－－－－－－－－－－－－－－－－－－－－－－－－－－

　　股票市值　　　　：　５３１５０元
　　剩餘現金　　　　：　９３１７３元
　　組合淨值　　　　：１４６３２３元
　　組合本月收益表現：＋　０﹒１５％（截至上月底止組合淨值：１４６１０４元）
　　組合累計收益表現：＋３９﹒３６％（本金１０５０００元計）（２０１６年８月開倉）
　
　　＊數據截至今日１１：００ａｍ