第三季係各大運動品牌出新鞋款嘅時期，好似Adidas喺7月就出咗旗艦跑鞋Ultraboost嘅最新一代，而神州呢邊都唔輸蝕，特步(01368)最近都出咗新款系列。
特步早兩日就舉行記者會發布新一代冠軍版跑鞋「160X系列6.0」，新系列主打兩大核心科技，包括「XTEP POWER動能科技升級-GT700碳板」以及「XTEP ACE輕彈科技升級-射胚發泡」。其中包括三個款式，分別係「6.0」、「6.0 PRO」以及「6.0 MONXTER」，零售價分別為999元人幣、1299元人幣及2599元人幣，其中「6.0 MONXTER」全球限量2000對。
據講今次6.0升級版進一步減輕鞋身重量，「6.0 PRO」輕磅接近兩成，同時回彈同抗衰性能方面比上一代都有所提升，令用家跑步嗰可以慳多大約兩公里嘅體力。
新鞋銷量有待公布，但過去半年特步業績表現都尚算唔錯，中期純利賺多13%去到7.52億人幣，收入多一成有72.03億。更重要係佳績反映喺派息，中期息派15.6仙港紙，按年多14%。肯派息嘅股一般都唔會太衰，特步上個月放榜打後就一路守穩100天線，近期更加繼5月以來再度瀕臨250天線考驗，破唔破到就睇今次。近期百天線企穩，更加早喺7月畫咗個3.9銀嘅雙底支持，雙重保險支持應該唔細，後市就要睇吓市況得唔得，如果嚟緊上面零售數據唔好太差，特步如果破到牛熊線阻力就有望試一試上5.5銀，最樂觀可以試埋6銀，而最重要都要大市配合。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】國家隊奧運健兒訪港，有市民指難以購票感到遺憾► 立即投票
