魚缸有幾得人驚?有時真係超出你想象。今日(3日)有一隻股票跌足九成九,即係話你持貨一千萬,一日之內就輸剩10萬銀,得唔得人驚?講緊昇能集團(02459),股價昨日(2日)收市有成20銀樓上,今早最低0.14銀,搖身一變成為毫子股,挽吓手做埋仙股都唔出奇。
點解跌到咁得人驚?證監會昨日公布,指最近曾就昇能集團之股權分布進行查訊。查訊結果顯示該集團於2024年8月19日,有25名股東合共持有2.79億股該集團股份,相當於該集團之已發行股本之27.65%。截至2024年8月19日,合共有4930.9萬股該集團股份(佔已發行股本之4.88%)沒有結存於中央結算及交收系統(CCASS),亦無喺該集團香港股東名冊中登記。有關股權連同由該集團一名控股股東持有之5.825億股(佔已發行股本之57.67%),相當於該集團發行股本之90.2%。因此,該集團只有9894.1萬股(佔已發行股本之9.8%)由其他股東持有。
點解股權咁集中,相信大家都心知肚明,唔使我多講。博客一向對細價股特別謹慎,但呢隻又唔算細價股,昨日收市價有成20銀,市值有成200億,屬於大市值。雖然昇能集團今日跌咁多做埋市場焦點,不過博客始終對呢隻股有啲陌生。
睇返資料,公司主要生產及銷售超高功率石墨電極。舊年營收7200萬美金,蝕咗1500萬美金。而最近公布嘅今年中期業績,半年營收3200萬美金,跌26%,半年蝕1400萬美金,已經接近舊年全年虧損額。就憑咁嘅業績,股價竟然可以由4月唔夠2銀炒上20銀,市值200億銀,果然係魚缸奇葩,所以話,揀股一定點都要睇埋公司業績。如果揀錯股,隨時輸身家!
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】國家隊奧運健兒訪港,有市民指難以購票感到遺憾► 立即投票