噚日國家新聞出版署就公布7月份嘅國產遊戲審批結果，今次繼續批出過百個版號，孖屐完完全全感受到有政策風向支持嘅美好。上年底嘅遊戲新規事件落畫之後，阿爺就以每月過百個版號嚟穩定遊戲市場信心，自此就見到今年各大遊戲公司明顯加快咗發展步伐，其中中手游(00302)啱啱就完成增發一億股，盛惠1.68億銀。
中手游5月29號公布，以每股1.68銀發1億新股畀朱一航，批股價比起5月28號收市價溢價大約12.8%，到今日完成批股後，1.68銀更加比上日收市價溢價87%！雖然睇落係溢價八成幾，但其實批股之外，朱一航都先後喺場外場內增持，計埋今次呢1億股新股，持股量已經達到9.68%。
其實朱一航一路都睇好中手游，始於中手游成立13年，旗下有多個重量級遊戲IP，包括《仙劍奇俠傳》以及近期嘅《鬥破蒼穹：巔峰對決》。早喺2021年，朱一航就聯同B站(09626)以及盛天網絡參與投資中手游，雖然上年B站大幅減持，不過都未改朱一航對中手游信心。到今年遊戲業回春，朱一航明顯加大對中手游嘅投資，先喺4月派頭馬江育凱入局，4月底中手游就同朱一航旗下超競集團簽署策略合作協議，5月就更加連朱一航家族嘅合生商業都同中手游達成策略合作。
講開又講，朱一航之所以咁有底氣，溢價增持中手游，除咗因為佢自己嘅電競事業搞得好，身為合生創展(00754)嘅太子爺，自然都有一定嘅生意手腕，咁啱佢就睇中遊戲業。身為內房太子爺，鍾意打機到將打機變成事業，都唔止係得一股熱誠。2023年朱一航以自己名創立電競隊EDG電競俱樂部（EDward Gaming），過去十年以來都贏唔少國內同國際電競賽事冠軍，算係電競入面其中一支實力強隊。由以往都係參與電競賽事為主，今年針對中手游嘅增持，以至於簽訂合作協議，都反映朱一航參與遊戲發展嘅決心。
就喺今年3月，朱一航卸任合生泰景經理，可能就係為咗全力投入遊戲事業。目前合生創展主席由朱一航家姐朱桔榕擔任，不過朱一航都仲持有超過一成八股權，但而家呢個時勢，搞電競點都好過搞起樓，請請！
*編者按:本欄搜羅即日熱門傳聞，惟消息未經證實，《經濟通》亦不保證內容之準確性；本文只供參考之用，並不構成要約、招攬或邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《經濟通》、編者及作者無關。
【你點睇】機管局獎勵航空公司增往來香港航線，措施能有效推動航空業復常？► 立即投票
40,453.53
