按盤價 
《小傳日記》恒指今日走勢反覆偏軟，收市倒跌６０點。比亞迪（０１２１１）今日跌幅雖
然輕微，但近期股價累跌唔少，自７月１５日高位２４９﹒６元開始反覆下跌，短短一個月跌咗
大約１５％，期內，恒指只跌５％左右，比亞迪明顯跑輸大市。
比亞迪月初公布，７月賣出３４﹒２萬輛新能源車，再創銷量新高，按年升３０﹒６％，繼
續穩坐龍頭位置。銷量節節上升，照計股價應該有支持先係，點解唔升反跌？除咗市場預計內捲
惡化，車企毛利受損之外，由於基數愈來愈大，意味增長空間愈來愈小，更重要嘅係，持有比亞
迪大量股份嘅巴郡近期頻頻出貨。
７月１５日比亞迪股價高見２４９﹒６元，為今年最高價。巴郡就喺第二日（７月１６日）
減持約１４０萬股。而且早喺６月１１日同６月１９日，分別減持１３５萬股同２０２萬股。巴
郡持貨１４年，投資眼光同耐性都唔係一般人可比。但自２０２２年亦開始減持，Ｈ股持股比例
由２０﹒４９％到７月１６日減至低於５％，之後減持唔再需要申報，所以呢一刻手頭剩返幾多
貨真係無人知。雖然比亞迪銷量仍在上升，但巴郡減持已經接近尾聲。比亞迪股價未來走勢，會
唔會隨住巴郡嘅離場而向下，暫時不得而知。
巴郡持股１４年，股價由２００８年入股時，每股作價約８元，到今日收市２１２元，獲利
超過２６倍（未計算期內已派發股息）。巴郡喺２０２２年開始減持，若以當年最高價３３３元
（除淨前）計算，回報更高達４０倍以上。睇到呢啲數據，投資者可能只會羡慕巴郡從比亞迪獲
取嘅利潤，而忽略咗巴郡為比亞迪帶來嘅光環，為比亞迪創造嘅無形利益。
自從巴郡入股後，比亞迪喺國際車壇就開始聲名大噪。早喺２００９年，即係巴郡入股比亞
迪第二年，名不經傳嘅比亞迪參加底特律車展時，巴郡嘅幕後軍師芒格，千里迢迢跑到底特律為
比亞迪站台，即時吸引國際金融界及汽車業關注。巴郡持有比亞迪股份呢１４年間，除咗芒格同
巴菲特不斷唱好之外，巴郡嘅名字就好似比亞迪手上嘅名片傳揚開去，名人效應永遠比做廣告更
深入人心。呢十幾年，比亞迪之所以名揚歐美，銷路暢通無阻，芒格與巴郡嘅名氣功不可沒。所
以，唔好以為巴郡淨係識賺錢，人地都有付出㗎！簡言之，比亞迪同巴郡之間，可以話係相輔相
成變雙贏！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】本港無人駕駛自動車最快本月底試運，你會否乘坐？► 立即投票
