按盤價 
《魚缸博客》魚缸今日忽然被隻京東（０９６１８）震一震，啱啱先出完份超靚仔成績表，
但竟然引來大股東Ｗａｌｍａｒｔ趁高散貨，傳話要清倉持股，令到恒指今朝都要跌成２００幾
點。好在午休前只係跌百幾點，始終今日都仲有唔少靚績，其中一隻就係泡泡瑪特
（０９９９２）。
泡泡瑪特截至７月已經連升六個月，主要係因為盲盒風潮吹到去歐洲，孖屐睇好泡泡瑪特海
外市場增長，就喺呢半年來一路追買。而今次成績表都市反映預期係無錯；中期經調整純利大增
９０﹒１％達１０﹒１８億人幣，收入增加６２％達４５﹒５８億人幣，毛利率多３﹒６個百分
點至６４％。以地區計算，雖然內地繼續係收入來源，期內增長３１﹒５％達３２﹒０６億人幣
，但收入佔比就由上年同期嘅８６﹒６％降至７０﹒３％。
當然最大原因就係港澳台及海外地區嘅收入增長，上半年急增２﹒６倍達１３﹒５１億人幣
，佔總收入由上年同期１３﹒４％升至２９﹒７％；毛利率亦急升７﹒２個百分點至７０﹒１％
。泡泡瑪特董事長兼ＣＥＯ王寧話，泡泡瑪特已經提前幾個月實現「海外再造一個泡泡瑪特」，
今年全年營收有信心做到１００億人仔，目標全年增長不低於６０％，海外增長不低於兩倍咁話
，認真大想頭！
不過泡泡瑪特今朝都吽吽哋，可能京東被沽實在太嚇人，泡泡瑪特等到１１點錢先開始有大
錢湧入，半日最多升超過一成。其實泡泡瑪特過去半年成交量都多返唔少，直頭有唔少大型資金
都開始留意到佢，慢慢開始喺下方收集。總計半日，今日一支大陽燭升破４３銀阻力，短線挑戰
５０銀仍應該唔算太難，但要留意５０銀嘅資金表現，如果有持貨嘅可以考慮先行減持一半食胡
，始終都升咗大半年，但敢博落去嘅都不妨揸著再博上６０銀！
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】烏軍攻入俄國庫爾斯克州近兩周，並炸毀兩座重要橋樑，你認為俄烏戰爭會否急劇惡化？► 立即投票
