按盤價 
《小傳日記》三中全會閉幕，可以話一如預期地無驚喜，好在炒作嘅錢喺呢幾日以來慢慢散
水，結果今日跌幅有啲多但未至於好大，只係恒指陰燭收穿２５０天線，後市肯定仲會有啲沽壓
，點都要小心坐穩。
ＧＤＰ唔得，政策唔夠力，之前集中追捧嘅中特估成為跌市主力。始終價又升完，息又派埋
，中特估表現的確係年初四咁樣。但其中電訊股今朝深潛完之後，午市居然上得返水面，中聯通
（００７６２）同中電信（００７２８）仲可以收升完場，就足以見到電訊股絕對係股民最愛。
經濟市道唔好，零售股最當災，唔係必需品可以唔買，唔係必食可以唔食，要慳家可以唔買
衫又唔飲啤酒。但係點慳都好，現代人唔可以唔用ｗｉｆｉ，電訊正正就係有呢個「唔用唔得」
必然性。而家神州瓣瓣都要網絡，尤其係畀錢都一定係電子支付，連街邊乞兒都要用
ｗｅｃｈａｔ ｐａｙ收錢，正正就係乞兒都要上網。
最近ＡＩ大會都已經推緊５﹒５Ｇ，５Ｇ嘅普及化都去到白熱化階段。據工信部最新數據，
截至５月底５Ｇ基地台總數達３８３﹒７萬個，佔行動基地台嘅３２﹒４％，而５Ｇ流動電話用
戶數目突破９億個去到９﹒０５億戶，佔流動電話用戶嘅５１﹒３％，即係已經超過一半人口。
恒指今日創下４月底以來最低收市價，仲穿埋牛熊線，走勢上絕對不容樂觀。但如果樣樣都
跌，電訊股作為傳統防守股，一定係避難首選之一，有多幾注實際上唔怕可以開始吼吓，慢慢儲
貨等下一個派息期再炒上，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】9歲泳手一度被拒參賽，議員指泳總執委會長兼任上訴委會長欠公正► 立即投票
