《小傳日記》三中全會閉幕,可以話一如預期地無驚喜,好在炒作嘅錢喺呢幾日以來慢慢散
水,結果今日跌幅有啲多但未至於好大,只係恒指陰燭收穿250天線,後市肯定仲會有啲沽壓
,點都要小心坐穩。
GDP唔得,政策唔夠力,之前集中追捧嘅中特估成為跌市主力。始終價又升完,息又派埋
,中特估表現的確係年初四咁樣。但其中電訊股今朝深潛完之後,午市居然上得返水面,中聯通
(00762)同中電信(00728)仲可以收升完場,就足以見到電訊股絕對係股民最愛。
經濟市道唔好,零售股最當災,唔係必需品可以唔買,唔係必食可以唔食,要慳家可以唔買
衫又唔飲啤酒。但係點慳都好,現代人唔可以唔用wifi,電訊正正就係有呢個「唔用唔得」
必然性。而家神州瓣瓣都要網絡,尤其係畀錢都一定係電子支付,連街邊乞兒都要用
wechat pay收錢,正正就係乞兒都要上網。
最近AI大會都已經推緊5﹒5G,5G嘅普及化都去到白熱化階段。據工信部最新數據,
截至5月底5G基地台總數達383﹒7萬個,佔行動基地台嘅32﹒4%,而5G流動電話用
戶數目突破9億個去到9﹒05億戶,佔流動電話用戶嘅51﹒3%,即係已經超過一半人口。
恒指今日創下4月底以來最低收市價,仲穿埋牛熊線,走勢上絕對不容樂觀。但如果樣樣都
跌,電訊股作為傳統防守股,一定係避難首選之一,有多幾注實際上唔怕可以開始吼吓,慢慢儲
貨等下一個派息期再炒上,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情