《小傳日記》神州市道唔好都唔係第一日,喺內需股身上就最反映到呢個情況,體品、啤酒
、餐飲跌完一浪又一浪,個個都睇淡消費市場。不過康師傅(00322)就無懼弱市宣布加價
。
近期有神州網民發現,食開嘅康師傅桶麵貴咗,隨後經內媒向官方求證,都獲得官方證實的
確係加咗價。其實早喺5月康師傅已經醞釀加價,當時有唔少經銷商都被康師傅口頭通知即將加
價,到今個月終於正式落手。官方講明,今次並唔係統一加價,而只係針對「經典系列」加價。
不過「經典系列」就正正係周街都係嗰個系列,反正就係最平民嗰16款口味。
不過康師傅並唔係單純加價,官方表示今次係「升級」:「經典系列升級將更能滿足消費者
需求,同時兼顧品質與價值的平衡。我們始終堅守提供高品質產品的承諾,致力於為消費者提供
健康營養的產品,以促進整個品類健康永續發展」。實際上有咩唔同,其實就係換咗包裝同麵底
。包裝方面其實只係多咗啲線條,感覺時尚啲;但新配方嘅變動就多啲,麵底用咗新配方,據講
落咗雞蛋會令麵底更加爽滑,乾燥蔬菜都加多咗一倍,個別口味仲講明跟多咗粟米同加濃咗湯底
。
對於今次加價行動,民間之前就有傳係原材料成本上升,不過呢個原因並未被官方證實,而
且喺2023年成績表入面,康師傅反而曾經提過「原材料價格下降」令到全年方便麵毛利率提
高3﹒05個百分點去到27%,所以成本上升一說未必係真。其實神州日日都講緊消費降級,
近期上面網民興起講「報復式存錢」,指後生仔女因為收入唔高,於是極度慳家咁過日子,熱傳
嘅極端案例更加係限制緊每日只用10蚊人仔食飯。康師傅桶麵除開每個都係兩舍個幾銀人仔,
絕對係「報復式存錢」嘅恩物!
經濟堂都有教,市道唔好就係「劣等財」(inferior goods)熱賣嘅時候,
消費降級咁耐,康師傅而家加價都算係加得遲,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】教育局最新初中教材提出應堅拒婚前性行為,你認為教材內容是否不合時宜?► 立即投票