按盤價 
《魚缸博客》今日滙控（００００５）高開２﹒４％，罕有地成為恒指成分股升幅榜亞軍。
雖然升幅唔係特別高，但因為今日港股疲弱，呢個升幅已經算唔錯。早前有外電引述消息指，滙
控考慮出售德國多項業務，涉及財富管理、託管及基金管理部。集團主席杜嘉祺出席滙豐香港股
東之非正式會議時表示，目前出售德國業務一事只是謠言（ｒｕｍｏｒ）或媒體猜測，現時並沒
有任何公告（ａｎｎｏｕｎｃｅｍｅｎｔ）。
自從科技股崛起後，滙控都沉寂左好耐了。想當年，滙控嘅風頭比起今日嘅科技股真係不遑
多讓。魚缸曾經流行一句話「聖誕鐘，買滙豐」，因為舊陣時每逢１２月底，好多基金經理都忙
住放大假，魚缸交投疏落，股價偏軟，造就買入滙控嘅良機。一般來講，股價第二年都好大機會
上升，當然，撇開個別年份大市調整就當別論。畢竟嗰個年代嘅滙控，股價仲係處於上升期，長
揸點都有錢賺。就連茶水間嘅阿姐都爭住買，話買來當儲錢，又可以財「息」兼收咁話。當然，
呢啲都已經係陳年舊事囉。
雖然滙控近年被科技股搶去風頭，但畢竟係實力派，絕對不容忽視。淨係睇每年嘅派息，就
已經令一眾科技股望塵莫及。再睇返２０２３年業績，滙控純利按年飆升５６％至２２４億美元
嘅創紀錄新高。反觀一眾科技股則良莠不齊，當中騰訊（００７００）舊年純利按年跌近四成。
市場睇重科技股，願意俾高ＰＥ，主要是寄望未來有可觀嘅增長，若增長不似預期，咁就要重新
檢討一下投資策略啦。
滙控自２月份以來，股價反覆向上，而家仲揸唔揸得過？其實，以一隻大約６倍ＰＥ，周息
率約１０厘嘅藍籌股來講，當然揸得過。不過，滙控股價自２月份低位５６元升至今日最高的
６３元，升幅超過一成，兼見６年高位。如果有耐性，不妨等等，睇下有無機會回調至６０元樓
下再入市。（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
