《魚缸博客》泰國嘅潑水節近年愈來愈受香港人歡迎,所以九龍城都搞咗個港版潑水節,俾
好此道者過下癮。可惜今年搬咗去公園,喺指定嘅範圍玩,大為失色。咩叫文化?你以為啲人純
粹鍾意潑水,咁不如去海灘,去泳池潑夠佢啦!使鬼去公園?博客有啲朋友為咗盡興,特登買機
票去泰國加入水戰。睇到媒體報道曼谷街頭嘅水戰,搞到博客都心郁郁,想玩埋一份。
講起水戰,博客諗起上個月因為娃哈哈創辦人宗慶后去世後,娃粉同農夫山泉
(09633)創辦人鍾睒睒引發嘅一場口水戰。估唔到一波未平,一波又起。日前,網上流傳
一張農夫山泉純淨水嘅宣傳圖,瓶身一改農夫山泉一直以來沿用嘅紅色主調,而改用綠色,同華
潤怡寶嘅包裝好相似。由於瓶上標明是純淨水,令人大感意外。原因係2000年,農夫山泉已
經宣布放棄生產純淨水,集中生產天然水,並發表「純淨水對人體無益」嘅言論。因此,引起當
時嘅純淨水龍頭企業娃哈哈不滿,為兩家企業嘅對立埋下伏線。
今次傳出農夫山泉重新生產純淨水嘅消息,有圖有真相,但農夫山泉既無承認,亦無否認,
態度有啲曖昧。如果真係有人造假,發放不實圖片,咁就應該出來澄清先係!定係今日嘅我打倒
昨日嘅我,有啲落唔到台?但係,「醜婦終須要見家翁!」避得一時,避唔到一世。
適逢華潤飲料(控股)有限公司近日向港交所提交上市申請,有媒體甚至將今次農夫山泉生
產純淨水形容為對華潤飲料嘅突襲。原因係華潤飲料旗下嘅品牌「怡寶」呢幾年一直係純淨水市
場嘅龍頭老大,佔內地純淨水市場近三分之一。但喺成個包裝飲用水市場,就輸俾農夫山泉,屈
居第二。兩家企業原本各不相干,你有你生產天然水,我有我做純淨水,名副其實嘅河水不犯井
水。但係而家農夫山泉殺入怡寶嘅純淨水腹地,戰況將會愈來愈激烈。
農夫山泉唔早唔遲,就喺華潤飲料準備上市時傳出生產純淨水,難免有啲瓜田李下,引來議
論紛紛。如果農夫山泉生產純淨水嘅消息屬實,對怡寶對華潤,短期定長線,都會不利。但華潤
畢竟係國企,與娃哈哈嘅民企不同,農夫山泉如果真係呢個時候推出純淨水,恐怕唔係明智之舉
。(vs)
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票