按盤價 
《小傳日記》近期魚缸回落，今日連１７０００都穿過，實在係令人灰心。不過跌市期間，
早排日日跌嘅東方甄選（０１７９７）反而逆市向上，今日仲偷偷哋上埋條廿天線，唔通真係翻
身？
道歉當食生菜嘅俞敏洪喺６月初道完歉之後，總算係過咗個半月嘅平靜，呢段期間都無發生
任何要令俞敏洪道歉嘅事，太耐無見反而有啲掛住佢道歉嘅日子。近排「韜光養晦」期間，東方
甄選就有「異動」，就係董宇輝真正「自立門戶」。啱啱上個周末，董宇輝品牌「與輝同行」正
式由新東方總部搬址，去到真正自己嘅小天地。
喺搬遷期間，一早已經有唔少「丈母娘」去到新總部圍觀，都有唔少有實力嘅「丈母娘」一
早就就嚟花籃同蛋糕祝賀。而喺２１號晚，與輝同行就搞咗一場入伙直播，帶網民隔住鏡頭參觀
咗一轉新基地。就喺呢場直播之後，竟然可以令與輝同行抖音號一晚就多差唔多１７萬ｆａｎｓ
，果然人紅就連入伙直播都可漲粉，如果東方甄選個價都有咁嘅升幅，你話幾好呢。
直播期間董宇輝就提到，今次新辦公室方方面面都多得俞敏洪大力支持，總算係幫俞老闆加
返啲光環。新基地有一大片訪談區，另設兩個大直播間同一個攝影棚，其餘辦公區域都多咗空間
，皆因今次與輝同行係租咗全層總共２０００呎嘅辦公室。董宇輝都提到，新總部大咗好多，新
地方租金比原先地方貴咗五倍，所以近期營運壓力都大咗唔少。
呢個半月東方甄選終於回歸平靜，但暴風雨嘅前夕總係特別平靜，下個禮拜就係阿媽新東方
（０９９０１）同東方甄選嘅放榜大日子，雖然近期普遍都有券商唱好，但咁高預期而且又炒起
咗，會唔會一出完成績又嗌差過預期跟著又倒跌呢？都未必唔會發生！希望兩份成績表都好好睇
睇，如果唔係，俞敏洪可能又要為業績太差而道歉，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》【怪獸家長必學】點樣幫仔女溫書不傷感情？培養上進心唔係靠鬧？子女一旦失控教你點應對！► 即睇
