《小傳日記》美斯no show一事再有進展,Tatler宣布經Klook買飛市民
可以退半數,今日起會收到由Klook寄出email,要喺4月12號前回覆先確認回水,
唔係就無。使咗幾千銀先可以退一半,反而東方甄選(01797)仲「格局大」,如果證實貨
不對辦承諾賠三!
東方甄選無見一排又踩到地雷,事緣央視每年3月15都會搞場維護消費者權益嘅節目,今
年都查到安徽阜陽有三間預製菜廠,用咗未經嚴格處理嘅「槽頭肉」嚟整梅菜扣肉包,而槽頭肉
即係香港叫嘅豬下青,通常附近都帶有好多淋巴腺,要切走先可以食,但就算切走咗,豬下青都
係下欄嘅肉,據講幾蚊人仔就有一大斤,處理唔乾淨食咗對身體都唔好。所以央視公布之後,當
地監管部門已去到廠房查處。
咁啱上年東方甄選就有賣過涉事廠房嘅扣肉包,今朝已經宣布會墊錢賠償,到下晝就再宣布
更加多賠償方案。東方甄選就話,去到上年10月29已經無賣出事嘅「御徽緣梅菜扣肉」,自
己係帶貨嘅代售商,事後已經查詢商家同生產廠家,兩邊都話隻預製菜包係無用到出事嘅槽頭肉
,仲話咗會盡快提供相關證據。
雖然有可能啲預製菜包真係無用下欄肉,但係東方甄選話出於「對食品安全事件零容忍」嘅
態度,決定係咪都先行墊錢退款,如果廠商證據證明唔到真係無用到違規槽頭肉,仲會再賠多三
倍,總共就係買一賠四!
經過董宇輝風波之後東方甄選見過鬼都怕黑,今次對關公嘅反應都快好多,雖然梅菜扣肉包
同美斯飛價錢差天共地,但係無事都退全數,有事仲賠三,作為消費者條氣都順啲。其實今次東
方甄選都無得反應慢,因為個節目係央視播,唔認數一定仲大鑊,所以賠錢一定有幾快得幾快。
而且,東方甄選可以反應咁快,好有可能係同廠商打咗合同有咩事係要三倍賠償損失,先可以大
大聲話買一賠四。所以,搞大壇嘢一定要砌好合同,如果唔係就要賠凸,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇