《魚缸博客》魚缸今日結束三連跌,開市升咗百幾點,之後仲愈升愈多,半日升緊百幾點。
今日啲細價股正正常常,反而康方生物(09926)波幅大過一眾細股價。康方開市後幾分鐘
已經好似坐神舟火箭咁一飛衝天,最高升咗八成七,認真誇張!通常呢啲咁誇張嘅幅度只會喺啲
細價股出現。康方股價有成40幾銀,市值更高達300幾億,一日之內就上天堂,唔知有無散
戶咁好彩,高位食到胡?睇怕都有啲難度,事關癲價只出現在一瞬間,幾十秒之後,股價已經返
去40幾銀。
康方生物公布,自主研發嘅新藥治療非小細胞肺癌III期臨床試驗獲益顯著。所以股價藉
勢抽升,不過,升八成幾又真係好誇張。對散戶來講,升就點都好過跌。相信經歷過上個禮拜五
股價一度暴跌嘅散戶來講,依然心有餘悸。
上個禮拜五(24日),又係開市無耐,股價就無端端係咁跌,最多暴跌近四成半。散戶嚇
到剩返半條命,都唔發生緊咩事。只係聽到流言,話康方其中一隻新藥臨床表現不似預期。直至
中午,公司先出來講嘢,話公司自主研發嘅全球首創雙特異性抗體新藥依達方新藥上市申請,已
獲國家藥品監督管理局(NMPA)批准。雖然股價跌幅收窄,不過,收市都要跌兩成幾。明明
係好消息嚟,點解可以跌咁多,公司點解唔早啲公布?博客真係答唔到,有啲嘢難於用一般市場
規律去解釋。
不過經歷過地獄與天堂,唔知散戶有乜嘢感想呢?相信一眾散戶嘅心臟機能一定愈來愈強大
,先至可以承受咁大嘅衝擊。雖然企業發展睇落唔錯,業務年年增長,舊年仲首年轉賺,前途一
片光明。但股價咁癲,少啲心血少都唔掂,買咗只能自求多福!(vs)
《編者按》本欄搜羅即市傳聞,惟消息未經證實,《經濟通》亦不保證內容之準確性。
【你點睇】烏軍攻入俄國庫爾斯克州近兩周,並炸毀兩座重要橋樑,你認為俄烏戰爭會否急劇惡化?► 立即投票