《魚缸博客》陸家嘴論壇今日開始,一如所料中證監重磅推出「科創板八條」,要突出科創
板「硬科技」特色,鼓勵科創板健全發行承銷、併購重組、股權激勵、交易等制度機制,更好服
務科技創新和新質生產力發展。
AI股沉寂一時今日終於借到東風彈升,其中美圖(01357)半日最多升超過一成,而
創辦人兼主席兼CEO吳欣鴻噚日就「咁啱」使248萬銀增持咗100萬股,然後今日就食正
AI股炒風,真係好手氣。
不過美圖今個禮拜都只係算反彈,上個禮拜就按周急跌咗一成三。事緣上星期美圖舉行第三
屆「美圖影像節」,曬冷旗下新產品,推出六款新AI工具,其中MOKI作為影片AI生成工
具,但就唔做如今最興嘅長片生成,而專注做短片創作。
孖屐就覺得美圖唔走去追上人哋技術,反為做一瓣唔係市場熱炒嘅概念,搞到美圖股價急跌
,先做到個低位畀主席入市增持。雖然主席喺會上提到唔想同Open AI嘅Sora正面對
決,所以先去做短片AI生成,被孖屐視為笠水,但實際上呢瓣都唔係無得做。
騰訊(00700)近年遊戲業務飽和,所以增長引擎已經逐漸改為微信視頻號,而視頻號
亦都爭氣展現佢喺廣告上嘅強大賺錢能力。視頻號主打流量變現,而流量多寡就由內容而定,所
以生成一條可以喺幾秒內就吸引人唔碌走嘅片非常重要。但剪片技術唔係人人有,美圖如果可以
幫到內容生產者慳水慳力做到一條高流量短片,絕對可以借到短視頻嘅流量變現能力。
美圖今日借「科創板八條」同主席增持消息反彈,現價喺2﹒7銀支持變阻力水平爭持,現
價不妨考慮追入,始終股價都已經跌咗一輪,唔跌穿2﹒4銀都仲值得揸住先,短線上望牛熊線
位大約3蚊水平。
《編者按》本欄搜羅即市傳聞,惟消息未經證實,《經濟通》亦不保證內容之準確性。
【慎防受騙】偽冒《經濟通》投資群組頻現,切勿誤信騙徙,如有疑問,請循官方渠道查詢► 了解詳情