《小傳日記》萬眾期待嘅QQ(00700)成績表終於出爐,整體算係中間偏好,不過孖
屐始終孤寒,有靚績都唔賣帳,搞到QQ都係要跌多過1%收市。
事前孖屐最睇重嘅本土遊戲收入最終都爭氣,按年賺多9%,算係符合預期,重拾增速。不
過樣樣都賺多咗,都總有挑骨頭地方,金融科技服務收入增速進一步放緩,QQ都解釋係因為消
費支出增長緩慢,即係個市唔好。有人就歸咎係呢點拖累QQ今日表現,不過魚缸趁好消息出貨
都唔係未試過,今日跌嗰1、2%都好畀面,要唔滿意起上嚟7、8%都係常事,今日其實都算
係正常發揮。
每次睇QQ嘅業績有度好,會清清楚楚分開每項業務寫清楚,每季業績都一樣,咁樣可比性
就高得多,仲會分埋按年比較同按季比較,實在係好方便。尤其每季睇住QQ嘅業績,都有一個
位值得留意,就係總會出現唔同嘅增長點。
幾年前,阿爺加強科網監管,遊戲業步入寒冬,最初QQ業績因為佔比最重嘅遊戲業務收入
減少而大受打擊,雖然好似瓣瓣都難搞,但總會喺三大業務入面搵到新「錢」路。譬如早兩年前
開始咗抖音式短片頻道「微信視頻號」,成功複製到抖音嘅賺錢模式,一季又一季之後,到今季
視頻號嘅廣告收入已經成為一大支柱,QQ都直言係「得益於推薦算法」。
而今次業績都搵到新增長點,就係微信小遊戲。唔同於QQ最搵錢嘅大型遊戲,小遊戲通常
玩法簡單,通常泡泡龍以至coin master都可算係小遊戲,呢類小遊戲入門更加簡單
,搭車期間玩最方便,經小程序玩更加大大增加現嘅用戶。QQ就提到上季社交網絡收入按年多
2%,其中一個原因就係得益於小遊戲平台服務費。
不過呢兩日都提到QQ原來都因為微信小遊戲而要同蘋果分成,亦即係「蘋果稅」,QQ首
席戰略官James Mitchell就提到,蘋果分成高達三成,係「非常沉重負擔」。目
前QQ仲未通過iOS來喺小遊戲賺錢,開始賺錢就要開始「交稅」,所以都仲傾緊有無得收順
啲。如果真係傾得掂,小遊戲增長都有望係視頻號之後嘅新引擎,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
WoW WoW星期三:2024最後一擊! (只限今天)► 火速行動