按盤價 
《小傳日記》微短劇、微電影、短片已經有咗好多年，但又好似ｈｉｔ唔起。不過，喺資訊
爆炸嘅年代，訊息只會有多無少，然以有涯除無涯，殆已！好多人鍾意睇日劇，都係貪佢節奏明
快。據報近年內地興睇短劇，舊年市場規模就超過３７０億人仔。
「星爺」都心郁，同抖音合作，搞個「九五二七劇場」。呢度扯開少少話題，大家可能唔知
點解叫「九五二七」，原來「星爺」啲戲，不論係警察定係監犯，個編號都好鍾意用「九五二七
」，但我認為，用「九五八八」可能仲適合！點解？自己諗啦！
返回主題，根據艾媒諮詢數據，估計微短劇市場規模今年會超過５００億人仔，２０２７年
更加過千億。喺內地主打網絡短視頻同直播平台，仲有提供網上營銷服務等嘅快手
（０１０２４）亦睇中咗微短劇市場。快手個劇情業務負責人於軒，尋日喺成都召開嘅《短片與
直播賦能產業高品質發展論壇》就話，集團將會同陳坤導演聯手推出快手首部ＡＩＧＣ微短劇，
仲預告，快手平台將會喺４月底推出首部ＡＩＧＣ微短劇《山海奇鏡之劈波斬浪》。
快手舊年營業額增加２０﹒５％至１１３４﹒７億人仔，股東應佔溢利接近６４億人仔，扭
虧為盈。快手應用嘅平均日活躍用戶增加６﹒８％至３﹒８億人，電商交易總額增加３１﹒４％
至超過１﹒１８萬億人仔。不過，快手股價喺２０２１年１１月２５日正式失守１００銀之後，
一路都變唔番「紅底股」，最悲慘喺２０２２年１０月底跌到３１﹒７５銀，之後反彈又跌過，
依家喺５０銀邊位，同「紅底」距離都差一半。如果微短劇大流行，快手重返「紅底股」行列唔
係無可能。「微不足道」呢句成語可能會多個兄弟，就係「微足以道」。如果投資者睇好快手，
要買可能真係要快手。請請！（ｐｃ）
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】特朗普遇刺案，你認為事件對年底美國大選起多大影響？► 立即投票
