按盤價 
《魚缸博客》近期多咗好多香港市民北上消費，除咗吃喝玩樂，當然唔少得去山姆血拼。一
河之隔嘅深圳，啲嘢之所以平過香港，不外乎兩個因素：租金平，人工平。人工就梗架啦，無得
郁。但租金就唔同，就算呢兩年香港租金跌返少少，但同深圳比，依然差成一大截。要留港消費
，除非租金進一步大減，但呢個可能性暫時比較低。事關樓價比高位不過跌咗一兩成，就有好多
人好多聲音向政府施壓，要全面撤辣救樓市。
假如政府真係全面撤辣救市，到時樓價回升，租金回升，進一步拉闊香港與深圳嘅租金差距
。只會造成香港啲嘢更貴，迫使更多人北上消費，結果會係點？香港嘅零售業進一步轉差，經濟
放緩甚至衰退，商鋪做唔住，租金自然都要減，到時一樣得個桔。所以，就算政府撤辣，短期或
者刺激樓市氣氛，但幫唔到幾多。
幾年前，政府信誓旦旦要幫年輕人置業，而家樓價跌得嗰一兩成，唔通已經到咗年輕人可以
負擔？所以在撤辣呢個議題上，政府所能做嘅已經唔多。查實，政府放咗咁多高才來港，已經幫
樓市注入唔少新血。如果政府進一步扶持樓市，搞到樓價回升，星斗市民買唔起，零售物價貴到
無人買，到時恐怕得不償失。
外圍方面，美國昨日公布嘅１月ＣＰＩ高於市場預期，意味著減息嘅時間表就算唔延遲，都
起碼難於提早。適逢有大行唱淡多隻本地地產股，並下調目標價。今日，一眾本地地產股股價應
聲下跌，普遍跑輸大市。就連掹車邊叫做半隻地產股嘅港鐵（０００６６）都唔例外，股價一度
跌半成。所以，無論係內房股定係本地地產股，暫時都係眼看手勿動。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】拜登宣布競逐連任，若民主黨讓賀錦麗代替參選會否有效爭取選票？► 立即投票
