《小傳日記》上市公司瘋狂融資炒幣，係不務正業定係擁抱新時代？

　　《小傳日記》近排比特幣大戶微策略公司（ＭｉｃｒｏＳｔｒａｔｅｇｙ）賺足晒眼球，正
當大家對其激進策略議論紛紛嘅時候，佢又大手筆買入比特幣喇。公司噚日（２５日）公告斥資
５４億美元購買比特幣，哩個已經係佢哋今個月第三個星期大買比特幣，前兩次分別用咗２０億
美元同４６億美元，穩居握有最多比特幣嘅上市公司，有沽空機構都話，如果睇淡比特幣可以選
擇沽空微策略做對沖。
　
　　講起微策略呢，其實佢本來唔係搞比特幣嘅，佢喺１９８９年就已經成立咗，本來喺ＢＩ
（Ｂｕｓｉｎｅｓｓ　Ｉｎｔｅｌｌｉｇｅｎｃｅ）行業裏面都算係個巨頭公司嚟嘅，一直以嚟
都有穩定嘅現金流，仲有一班好忠誠嘅顧客，平時主要嘅競爭對手就有ＩＢＭ　同甲骨文公司呢
啲大牌子。微策略一路都正正常常咁，點解無喇喇變咗美國幣少？
　
　　微策略嘅董事長Ｍｉｃｈａｅｌ　Ｓａｙｌｏｒ話呢，雖然公司業務表現一直都算唔錯，但
唔知點解，資本市場好似對公司嘅股票興趣唔大咁，於是公司就開始周圍搵高成長嘅投資目標，
最後就揀咗比特幣咁話。截止到昨日（２５日）呀，公司已經擁有３８﹒６７萬枚比特幣喇，帳
面價值超過２８００億港元！
　
　　以前呢，一間上市公司將大把資金投落去買比特幣呢類風險資產，大家肯定覺得間公司不務
正業，「好做唔做」先會去炒幣，但如今，唔少人都巴不得回到過去ａｌｌ　ｉｎ　比特幣。微
策略公司嘅投資策略甚至喺花旗國都堪稱前衛，事實上Ｍｉｃｈａｅｌ　Ｓａｙｌｏｒ都只係將
唔少幣圈中人　嘅做法搬到上市公司層面啫，佢將自己嘅策略定義為三重最大主義：用現金買幣
、趁股價高估配股買幣、趁利率低迷發債買幣，總之就係買買買。
　
　　以往股東普遍諗住，我之所以投資你呢間公司，都係睇好你嘅實業做得好，靠實實在在嘅生
意去盈利，認認真真做產品、搞研發、拓市場，利潤穩定，我就可以分到紅利，股票價格亦都會
慢慢升，咁先叫對得住我吖嘛。
　
　　不過呢，時代好似有啲變嘞。睇下微策略嘅２０２４年第一季度嘅財報，微策略嘅訂閱服務
收入僅得２３００萬美元，總收入為１﹒１５２億美元；但截至２０２４年１１月初，微策略嘅
比特幣浮盈就已經有１２９億美元嘞，真係差好遠好遠囉，價值投資講就好聽，投資者最終都係
睇錢份上。
　
　　其實香江都有個港版微策略公司，就係做美圖秀秀起家嘅美圖（０１３５７）喇。呢間公司
從２１年開始就踏入投資虛擬貨幣呢個領域，有人專門做過統計呀，截止到２０２４年１１月
１８日，按照美圖擁有嘅虛擬貨幣計算，增值部分達到８０００萬美元，並且上年仲派咗末期息
３﹒６港仙添，按年增咗八成咁多。
　
　　不過大家都知啦，比特幣呢類加密貨幣，價格就好似坐過山車一樣，尤其係有好多不可預知
因素，一旦有大戶高位大手拋貨，分分鐘血流成河。
　
　　上市公司要好好諗下，到底該點樣去平衡實業同虛擬投資呢？神州以前有句說話叫「炒房興
邦」，諷刺社會只顧炒樓無人做實業，如今花旗國就有人「炒幣興邦」，公司融完資就埋頭炒幣
，咁對整個資本市場嚟講又係唔係好事？聽講特朗普想新設職位管理虛擬貨幣政策，呢個問題絕
對值得未來官員思考一下，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。