《小傳日記》廣汽發布固態電池技術，惟難改車市競爭激烈形勢

　　《小傳日記》早前小米（０１８１０）推出ＳＵ７，售價只係２１萬人仔多啲，遠低過預期
嘅３０萬，震撼車市，雷軍話車主可能有五成係女性，睇架車款又確係幾啱女士嘅。
　　不過，電動車相關消息陸續有來，廣汽（０２２３８）今日發布全固態電池技術，據講續航
超過１０００公里。廣汽埃安電池研發部負責人李進喺發表會上話，集團憑藉第三代海綿矽負極
技術，同埋高面容量固態正極技術，實現全固態電池能量密度達４００Ｗｈ╱Ｋｇ以上，較目前
量產嘅液態鋰電池體積能量密度提升５２％以上，質量能量密度提升５０％以上，實現超過
１０００公里續航力，目標喺２０２６年完成全固態電池開發，並會先搭載喺昊鉑車型。
　　各位可能會問，固態電池同鋰電池有咩分別？兩者主要分別係電解質，鋰離子電解質係液態
，以凝膠體、聚合物形式，令電池重量難以下降，而且單一鋰電池組能量唔高，所以要將多個電
池組串連，增加咗重量，佔電動車整體成本好大比重。
　　另外，電解質具可燃性，喺高溫下唔穩定，大家應該都喺網上見過電動車著火嘅場面。凍得
滯，電解質又容易凍結，降低電池續航力。電解質仲會腐蝕電池內部組件，充放電過程會產生晶
枝（ｄｅｎｄｒｉｔｅｓ），降低電池容量、性能同壽命。
　　固態電池內部冇沉重嘅液態電解質，所以內部更加緊密、體積更細，能量密度增加。電動車
採用同樣體積嘅固態電池，電容量理論上可以提升兩倍以上。而且固態鋰電池唔使電池監測、冷
卻同保溫系統，亦可以喺底盤放置更多電池，令續航力大增。另外，充電速度亦比鋰電池快，亦
冇腐蝕性問題、壽命更長，更加唔會因為低溫而凍結。
　　不過亦有唔完美之處，就係固態電池成本高、唔易量產，結構緊密容易熱脹冷縮。除咗廣汽
之外，特斯拉、豐田亦分別計劃喺今年同２０２６年推出固態電池電動車。不過，現時固態電池
行業嘅代表就係寧德時代同比亞迪（０１２１１）。睇嚟電動車採用固態電池係趨勢，唔係優勢
，規模較細嘅車企好難單憑改用固態電池而突圍，令汽車業繼續喺無止境嘅賽道競爭！（ｐｃ）
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。