《小傳日記》港股近日牛氣衝天,恒指連升第5日,唔單止無回調嘅跡象。甚至鞭鞭有力,
愈升愈有!即使隔夜美股三大指數下跌,絲毫無損港股今日嘅升浪。恒指今日曾升超過400點
,仲破過條250天線(約17717)。呢幾日嘅升市,除咗受幾隻大型科技股推動之外,內
房板塊亦意外跑出。龍湖集團(00960)、中海外(00688)同埋華潤置地
(01109)暫時領漲一眾藍籌股,升緊7%至12%不等,包辦恒指成分股升幅榜頭三位。
尋日傳聞深圳將於「五一」後取消福田、南山之外區域嘅限購政策,同時將二手房增值稅免
徵期由5年改為3年。雖然深圳相關部門都話暫時無收到內部通知,但尋日個別內房股就先行炒
上。
不過,有另一單更吸睛嘅報道。有媒體話,瑞銀大中華區房地產研究主管分析師林鎮鴻接受
媒體訪問時表示,經過三年睇跌之後,第一次對內地房地產板塊睇得好樂觀。佢預計,一旦房價
穩定落嚟,被壓抑嘅需求將會回歸,因為過去三年房地產價格下跌,已經導致好多人推遲買樓。
佢又提到,由於好多房地產企業已停止買地建屋,從而減少咗供應。喺樓市低迷期間,中國
開發商嘅新屋開工量下降58%,遠高於同期按面積計房地產銷售37%嘅降幅。佢認為,呢種
「去庫存」,可能會使內地住房庫存水平明顯下滑。內地住房需求同供應將喺明年恢復到歷史平
均水平,中國大型地產開發商們嘅股票可能會出現反彈。今年1月,佢已經將龍湖集團控股等幾
家房地產公司的評級上調為買入。
呢位林分析師何許人也?傳聞2021年1月,就係佢率先下調恒大(03333)嘅評級
,並大砍恒大目標價一半以上。成為當時19位關注恒大嘅分析師之中,唯一一位將恒大評為賣
出嘅人,引起市場譁然。之後恒大爆雷,股價持續下跌,印證了呢位大師嘅慧眼。而家大師再度
出征,今次唱好唔唱衰,睇好內房企業邁向復甦,大家當然寧信其有。當然,點樣令樓價穩定落
來,本身亦係一個難題。買唔買樓,同經濟環境、老百姓收入息息相關,唔止係簡單庫存問題。
過去幾年,面對內房債務危機,中央多次推出利好政策穩樓市,穩民心,可惜穩唔住內房股
嘅股價。雖然每次利好消息傳出後,內房股都會趁勢炒下。只可惜,每次都曇花一現,反彈之後
又散水回跌,俗稱「彈散市」。今次大師出征,如果真係穩住內房股價,穩住股民嘅心;甚至穩
住積弱多年嘅內地樓市,咁就唔係大師咁簡單,直頭可以封佢做國師添。請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
【你點睇】工聯會調查指外勞輸入政策影響漸現,多個行業失業比例較高,促暫停輸入外勞,你是否認同?► 立即投票