按盤價 
《小傳日記》藥明系又逃過一劫！魚缸噚日一棍破廿天線兼重上１６０００，到今日果然都
要唞唞，不過藥明系今朝起全線反彈，事關之前搞到藥明一鑊粥嘅美國《生物安全法案》「未開
始已經結束」！
事前已經有傳草案過關嘅機會已經愈來愈細，開始有議員扽軚唔玩，到隔晚有外媒發現，美
國國會官網顯示，支持草案嘅議員人數已經由六個減到一個不剩，只係得返提出草案嗰位民主黨
始作俑者，一隻手掌拍唔響，孖屐斷估呢壇大龍鳳應該就係咁先啦，於是今日全條藥明系都大幅
反彈！不過沽貨容易買貨難，今日飆高即刻見獲利回吐阻力，收市前升少好多。
議案一出，藥明生物（０２２６９）同藥明康德（０２３５９）股價都腰斬一半，如今條草
案即將難產，但係藥明系一跌無回頭，公司回購極今日都唔係好肯升。
如今孖屐普遍都預期，美國大選年內對中國多方面嘅打壓都永無休止，但係今次講完又放生
藥明，證明美國國內嘅態度都傾向飄忽。由六個減到零個，雖然本身已經唔算多人，不過有人提
都係會驚咗先，如今真係一個「零」先令孖屐安心。雖然成日講藥明有超過一半業務都依賴美國
市場，不過藥明依賴同時，當地大客調轉頭都要依賴藥明，因為藥明嘅開發配套真係有優勢，美
國客一時三刻都唔會離得開藥明，如果封殺落實，好有可能殺敵一千自損八百，美國商界都唔會
制，諗通咗嘅議員自然會縮沙。
不過戴返個頭盔，暫時唔提唔代表唔會捲土重來，一個未成氣候嘅草案都可以打殘藥明，今
年內隨時發兩句噏風，可能又會殺多鑊，撈底藥明最好練定手速，事必要縮沙嗰陣仲要快過班美
國議員，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【你點睇】特朗普遇刺案，你認為事件對年底美國大選起多大影響？► 立即投票
