《小傳日記》噚日聯交所大鑼大鼓,連財爺都親自到場,就係為咗幫魚缸第一隻18C股晶
泰科技(02228)敲鑼造勢。
「18C」其實即係《上市規則》〈第十八C章〉提到嘅特專科技公司上市,新規上年3月
底正式生效。新規提到嘅「特專科技」(Specialist Technology)涵蓋
五個科技專業:(一)新一代信息技術;(二)先進硬件及軟件;(三)先進材料;(四)新能
源及節能環保;及(五)新食品及農業技術;而晶泰科技就算係從事「先進材料」嘅公司。
18C新規容許未商業化嘅特專科技公司上市,但股份名稱後面要加個「P」字,即係類似
B仔股咁,所以晶泰科技正式股份名稱係「QUANTUMPH-P」。晶泰以接近招股價下限
定價,每股發售價5﹒28銀,噚日開報5﹒39銀後一度低見5﹒31銀,今日最低都見
5﹒36銀,連續兩日都力保發行價不失。
晶泰科技除咗係「18C第一股」之外,亦都被稱為「AI製藥第一股」。據招股書第一段
簡介,公司係基於量子物理、以人工智能賦能和機器人驅動嘅創新型研發平台,以AI同雲計算
為製藥與及材料科學提供科研解決方案。其實簡單嚟講晶泰科技更加似係CXO板塊嘅類別,綜
合招股書入面對於業務嘅詳細描述,晶泰科技其中一項主業就係用一套AI系統,喺實驗室入面
為客戶用AI運算唔同嘅分子,測試出邊一啲組合嘅結果係更加具有研究落去嘅可能性,大大縮
短以往大海撈針嘅逐個組合測試嘅時間同成本。
據晶泰科技提到,以往要發現新藥嘅先導化合物,傳統人工方法需時兩年半,用到AI就要
大約十個月,而用上晶泰科技基於量子物理嘅AI運算,就可以喺唔夠兩個月內發現到先導化合
物,更加獲得輝瑞青睞而達成長期合作。
基本面確係好,但誠如招股書之中提到,美國《生物安全法案》一旦生效都會對公司有影響
,而2023年來自美國客戶嘅收入已經佔總收入三成,即使仲有八年,但《法案》都會成為公
司海外擴張嘅障礙,未來要視乎來自中國嘅收入有無得提升返多啲,請請!
*編者按:本欄搜羅即日熱門傳聞,惟消息未經證實,《經濟通》亦不保證內容之準確性;本文
只供參考之用,並不構成要約、招攬或邀請、誘使、任何不論種類或形式之申述或訂立任何建議
及推薦,讀者務請運用個人獨立思考能力自行作出投資決定,如因相關建議招致損失,概與《經
濟通》、編者及作者無關。
《說說心理話》【驚恐症來襲】無預警發作...患者親身講述得病經歷及康復過程!必要時自己做一件事可幫到手!► 即睇