《魚缸博客》促汽車消費通知出爐，比亞迪有望挑戰２６８銀？

　　《魚缸博客》內地公布咗５月ＣＰＩ同ＰＰＩ，表現唔係特別好。５月ＣＰＩ按年上升
０﹒２％，低過預期嘅０﹒３％，但就比４月嘅按年升０﹒１％好啲。至於ＰＰＩ，５月按年跌
４﹒６％，差過預期嘅跌４﹒３％，更加成為２０１６年３月以嚟近７年最大跌幅，反映工業用
品市場需求仍然比較弱。
　　ＣＰＩ同ＰＰＩ無乜驚喜，魚缸今朝走勢同樣無乜驚喜，就算有政策消息嘅汽車股都提唔起
勁。商務部辦公廳宣布喺６月至１２月開展一系列汽車促消費活動嘅通知，要求發揮地方財政資
金作用，鼓勵金融機構出台汽車信貸金融支持措施。
　　至於汽車下鄉方面，商務部指喺全國千幾個縣、萬幾個鎮開展新能源汽車「大篷車」進農村
等新能源汽車促消費活動，推動完善農村地區充電基礎設施體系，依托縣鄉商業網點、企事業單
位等場所，合理推進農村集中式公共充電樁場站建設。
　　汽車股並無因為呢啲政策而急升，其中宣布旗下專業個性化品牌、內部代稱嘅「Ｆ品牌」正
式定名做「方程豹」嘅比亞迪（０１２１１）只係微微上升。公司股價由３月１４日低位
１９０﹒５銀反覆向上，直至前日高位２５５銀，累積咗超過３３％嘅升幅，近期股價立番少少
都合情合理嘅。按照目前走勢，比亞迪仲有得上試年內高位２６８銀，有貨嘅朋友仲可以揸住，
無貨嘅朋友就可以等落番２３５銀吸納，值博率會比較高。
　
《編者按》本欄搜羅即市傳聞，惟消息未經證實，《經濟通》亦不保證內容之準確性。