《小傳日記》股神又出貨，兗礦勢無阻，英揆誰屬一早預咗？

　　《小傳日記》今日都算係風風雨雨嘅一日，消息一個接一個，個個鑊都開猛火，想炒咩都得
。好似ＢＹＤ（０１２１１）又畀股神沽貨，結果又唔見多近６個巴仙，查實股神都應該有排出
貨，如果每次出一批都要跌一跌，咁就真係有排跌；不過睇返ＢＹＤ都連跌第六日，而２１０銀
水平都應該有啲支持，可能撐到一陣，但係孖屐嘅擔憂都係無日無之，跌到咩位先完就要逐個支
持位睇，唔夠眼明手快就唔好隨便入手博反彈喇！
　　曾經都經歷股神沽貨嘅中石油（００８５７）今日就隔岸觀火，睇住人跌自己升，事關今日
傳出俄佬宣布會無限期停止北溪一號供氣，全線油股、油服股，連煤炭股即時大升，刺激兗礦
（０１１７１）勁升一成二又再破頂！同系隻兗澳（０３６６８）都勁飆一成六，一樣邁向緊
４２﹒５銀頂位。一陣開會嘅油組會後就會宣布減產定唔減產喇，而家就傳緊未必會減，據報因
為俄佬唔想加劇孖屐認為原油供過於求，所以寧願維持產量咁話。
　　除咗油組決定就快出爐之外，米字國保守黨黨魁選舉結果都會喺今晚揭盅，目前睇嚟都已經
無懸念，外相卓慧思會當選，呢場選舉都示範咗保守黨內部嘅架構同埋政治關係，好多分析都話
，卓慧思當選後要面對可以預期嘅極高通脹環境，絕對唔容易過，而即將來到就係斷氣後嘅歐洲
大陸，呢個時勢敢上位都要強韌嘅意志力先得。
　　今日咁多懸而未決嘅消息，而聽日魚缸嘅反應會對後市有啲啟示，魚缸１９０００點有幾大
力就睇埋聽日喇，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無涉。