神州砵砵車一向都想走向國際、打入花旗國「孖屐」啦,貪佢人均汽車擁有量高,加上消費能力相對較強。不過。廣汽(02238)旗下品牌傳祺(Trumpchi)要踏出第一步,就要能比其他品牌更難,皆因佢嘅英文譯名同花旗國總統侵侵(Donald
Trump)個姓氏有幾番相似,依點對於希望打入花旗國,就唔敢肯定是福還是禍啦!
廣汽總經理馮興亞就強調「撞名」純屬巧合,指出「Trumpchi」只係普通嘅音譯,並無包含任何特別意思。而「傳祺」原本個意思都幾有詩意,代表「傳遞美好嘅祝願」。
雖然話個譯名幾年前已經出現,而侵侵係喺之後先當選總統,不過廣汽都無喺呢個問題上企硬。馮興亞就話集團依家都有著手研究緊,包括若品牌名同當地領導人個名接近嘅話,會唔會有法律上嘅問題,同埋話如果有需要,會揀個花旗國消費者感覺上舒服啲嘅名,都算係幾有誠意。
查實唔使盈盈講到出口,大家都知道廣汽係怕侵侵個名會趕客啦,不過都唔係全個花旗國都唔like佢嘅,話唔定侵侵口嘅粉絲團,反而會因為呢個名而買車呢?但始終個名都只不過係個稱呼啫,與其花時間去諗改咩名,不如度下橋點樣打贏啲日產砵砵車先啦!《任盈盈》
《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》關於「沉迷成癮」:點預防同戒甩鋪癮?最重要改變一樣嘢!追星都算成癮?► 即睇