《魚缸博客》領匯（００８２３）仲係得４厘幾息？仲未跌夠！

　　雖然美國聯儲局會議記錄無講到幾時收水，不過市場就一於繼續有斷估無痛苦，當正九月就開始退市，呢幾日美國國債債息係咁升，已經上到近３厘水平，搞到一眾息口敏感股份呢幾日係咁跌唔停。其中領匯（００８２３）仲已經跌「熊熊」聲，真係相當弱勢！
　　雖然領匯年年條數都交到功課，基本業務搞得唔錯，不過基金股講到尾都係用息口吸引人，買得嘅都係想穩穩陣陣收息過日晨。但係睇返而家，領匯由高位碌落嚟，股息率雖然係升返啲，但仍然只係得４厘幾，實在唔算好吸引。缸友如果換返人仔返神州做一年定期，閒閒地都有呢個水平，又唔係高過美國國債好多，計返風險因素，真係唔多抵。
　　睇返公仔圖，股價由４５蚊高位跌到而家３５蚊左近，已經蒸發咗兩成幾，技術上步入熊區，雖然ＲＳＩ跌到３０都無，已經好超賣，不過今日穿埋６月頭底位之後，都無咩支持位可言，三個字講得晒，就係「未跌夠」，缸友們千祈唔好心急撈貨！

　　《編者按》本欄搜羅即市傳聞，惟消息未經證實，《經濟通》亦不保證內容之準確性。