《魚缸博客》小米雷總hold得住輿論，但似乎hold唔住股價

　　升得再耐都會有跌嘅一日，市係咁，股都係咁。但勢估唔到小米(01810)嘅回吐係要用人命嚟換。

　　早幾日29號晚，一架載有三名女大學生嘅SU7喺公路撞欄起火，三人未能逃出車廂因而葬身火海。據自稱死者家屬指出，因為車輛撞欄後車門鎖死，至令死者未能逃出。

　　而今次都算係SU7發布以來第一單涉及人命事故，小米方面都係高度關注，所以事故之後一日雷軍已經即時派人去了解情況，到噚日已經出到初步調查結果。據小米官方講到，事故發生前車輛處於NOA智能輔助駕駛狀態，當檢測出障礙物後發出提醒並減速，並轉入人駕狀態，但直至撞欄前車速仲係97km/h。但以小米公布的時間嚟睇，由NOA退出到碰撞總共只有兩至三秒時間，可能死者當時根本反應唔切，即時轉為人駕狀態都係司機未能反應得切。

　　由於事故仲有好多未消楚詳情，責任誰屬仲好難講，但值得留意係雷軍再次施展強大「關公」，更正面承擔責任提到「無論發生甚麼，小米都不會迴避」。而以目前調查情況嚟睇雖然疑似唔涉及人為失誤，但針對由NOA轉為人駕嘅反應時間太短，可能就係今次事故嘅原因，小米比較大機會責無旁貸，亦令雷軍無得唔用一個謙卑啲嘅態度面對。

　　呢個智駕系統嘅bug其實算係當頭棒喝，令人知道呢個轉換嘅反應時間係會唔得，亦係未來行業應該要關注嘅問題。不料係今次係事涉小米，睇怕小米目前嘅不利因素仲未反映得曬，換句話講仲有得跌。

《編者按》本欄搜羅即市傳聞，惟消息未經證實，《經濟通》亦不保證內容之準確性。