《魚缸博客》歷時幾粒鐘戒嚴快過我打邊爐，韓Won有機會反彈？

　　昨晚（3日）博客臨訓覺前，突然電話彈條信息：「南韓立即宣布進入戒嚴狀態。」嚇到我，博客中意個班韓國妹豬點算好？News Jeans先剛離開舊公司，ILLIT先剛出歌，會唔會有危險啊？

　　誰不知，呢場所謂「戒嚴」，經歷唔知有無六個鐘就完結，之前個一刻，博客個腦閃過好多水炮車、坦克、好多人受傷，好多韓民點樣喊喊，原來係博客想多左。

　　不過尹錫悅呢種「弱小民族埃塞俄比亞發爛渣」確實嚇親個金融市場，特別係隔晚韓Won，1美元對韓Won由1410跌到落1443，個支陰燭真係夠曬凶險。

　　其實韓Won貶值並唔係突然發生嘅事，今年年初仲見過1290年水平，慢慢到年尾就跌到落1390咁上下。其實韓國有好多結構性問題，例如美國息口令東南亞貨幣貶值、韓國人口老化、出口數字不如人意等等，都係令韓Won貶值主因。

　　聽聞呢次「小政變」令韓國政府立即出手干預貨幣市場，目前韓Won回升到1416水平，博客認為，呢一水波動夾唔死好友，就必然惹來鯊魚反撲，特別見到韓Won已經有五連陰出現，如果想博短線反彈，而家就係一個好機會啦！

　　不過提醒返，外匯市場波動難以估計，所以投資者要有萬全準備，博客預計如果呢水真係反彈，會有2-3%水位咁上下，大家好好把握！

《編者按》本欄搜羅即市傳聞，惟消息未經證實，《經濟通》亦不保證內容之準確性。