《魚缸博客》恒指有望展開反彈浪，電視廣播一蚊風險博兩蚊利潤！

　　《魚缸博客》美國聯儲局星期三晚（１１月２日凌晨）議息會後，一如預期維持利率不變，
聯邦基金利率目標範圍保持喺５﹒２５至５﹒５厘，理由係家庭同企業嘅金融同信貸環境緊縮，
預期會抑制經濟、招聘及通脹，影響程度唔確定，而ＦＯＭＣ對通脹風險保持高度關注。至於未
來貨幣政策取態，亦要考慮累積加息幅度，同埋對經濟及通脹嘅滯後性影響。
　　市場就預期美國加息周期結束，尋晚（２日）美股三大指數急升超過１﹒７％，港股今朝表
現都明顯強番。恒指裂口高開１７５點或升１％，報１７４０５，之後升幅持續擴大到超過
４００點，留意尋日已經收復番條１０天線（現約１７０１０），今朝破埋條２０天線（現約
１７４５８）。我喺１０月２７日話恒指有望短期見底，亦唔相信期指結算前仲質落去
１６８００至１６５００，依家恒指就進一步向上突破，而且突破埋１０月１９日以嚟嘅橫行區
頂，所以我選擇相信恒指已經展開有幅度嘅反彈浪，初步望住１８２９０，破到嘅話，恒指有望
形成一浪高於一浪走勢！
　　個股方面，之前隻隻皆跌唔知有咩揀，依家就隻隻皆升揀咩都得。不過，今日都係講吓隻電
視廣播（００５１１）。
　　集團預期截至今年１２月底止六個月將實現正數ＥＢＩＴＤＡ，而相比今年頭６個月
ＥＢＩＴＤＡ虧損１﹒８６億銀。集團又話，截至今年９月底止三個月未經審核營運資料顯示，
翡翠台平日黃金時段電視廣告平均單價喺今個季度呈現積極趨勢，按季及按年分別上升１６％同
４６％，就今年底前預先承諾購買２０２４年電視廣告套餐嘅客戶，平均價已按年提升約８％。
另外，自今年３月集團同淘寶建立電商直播合作關係起，及至本季度末止６個月內，集團銷售產
品之商品交易總值（ＧＭＶ）約２﹒５億人仔。
　　電視廣播股價反應好大，１０月２６日低見２﹒７８銀，第二日已經升到３﹒３８銀，升成
２１﹒６％；但升勢未止，尋日雖然出咗支陰燭，但高位已經去到４﹒２９銀，累積升咗
５４﹒３％，股價暫時守住４銀。唔望股價好似今年３月炒直播帶貨時咁癲，６銀都應該會到啩
！現價４個零可能都要落一注先，如果有機會回到５０天線（現約３﹒３７）就再加一注，收低
過３﹒０５銀就止蝕，以一銀風險博兩銀利潤都算值博啩！（ｐｃ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。