《魚缸博客》Ｄａｖｉｄ　Ｗｅｂｂ都沽佐丹奴，係咪未跌完？

　　《魚缸博客》今日本地魚缸高開後續升，執筆時恒指升約１００點，算係跌咗咁多日後嘅小
反彈。博客今日想講下隻佐丹奴（００７０９），事緣根據聯交所資料顯示，獨立股評人
Ｄａｖｉｄ　Ｗｅｂｂ於上周二（１５日）減持佐丹奴９８萬股，每股平均價３﹒２１６元，套
現３１５﹒１７萬元，持股量由５﹒０５％降至４﹒９９％。佐丹奴股價應聲急插，一度插
１１﹒２８％，低見２﹒９１銀。
　　佐丹奴日前公布，截至今年６月３０日之中期業績，錄得純利１﹒９億元，按年增長
９５﹒９％，每股盈利為１２仙，按年增９６﹒７２％，派中期股息每股１７仙。毛利率升
３﹒６個百分點至５８﹒７％，由於售價上升及折扣減少。
　　期內，銷售額１９﹒７億元，按年增加４﹒９５％。當中，大中華、東南亞及海灣阿拉伯國
家合作委員會３大市場均錄得增長，升幅近３％至逾１０％。以固定匯率計，上半年港澳銷售額
升逾４２％，業務扭虧為盈；內地銷售額升逾７％，由大幅虧損轉為微利。
　　至６月底止，門市數目減少至１７９８間。集團預計，今年餘下時間定價能力可以持續，店
舖數目亦將有增長。
　　睇返走勢，佐丹奴今日裂口低開，走勢現大陰燭，已經係連續兩支陰燭，且跌穿１０天及
２０天線，短期跌勢未止，連Ｄａｖｉｄ　Ｗｅｂｂ都沽貨，唔通你同佢「對著幹」？
　
《編者按》本欄搜羅即市傳聞，惟消息未經證實，《經濟通》亦不保證內容之準確性。