《小傳日記》一篇假文炒起「四川概念」！茶百道變妖好無辜

　　《小傳日記》幾次失望嘅記者會之後，救股市的功勞又落喺「央媽」身上。人行行長潘功勝
今朝出席論壇就預告，下個禮拜ＬＰＲ「可能」會一次過減２０至２５點子，加上此前多項振市
措施正式落地，魚缸下晝終於發力，一路最多升超過８００幾點，成交都終於按日回升。乜都炒
得起，但係前幾兩日炒起嘅茶百道（０２５５５）今日就有陣散水味，升過三成最終又回落得返
４％。
　　早兩日上面有傳聞話四川正式開始超過兩萬億嘅拆遷項目，仲有人因為賠償而一夜暴富，當
時Ａ場同魚缸都因此而炒起咗全線有關四川、重慶等等嘅「概念股」，而成都起家兼有熊貓做嘜
頭嘅茶百道，就食住呢場東風最高炒過上１６銀。
　　但時隔兩日成都公安已經火速破案，發現原來有位人兄用ＡＩ生成咗呢篇「四川啟動
２﹒１５萬億拆遷項目」嘅假文，隨後又有人附亂噏，話「有朋友賠了１７套房」，又話「賠了
９６７﹒４３萬」，連實數都有講到似層層，結果就水咗成個孖屐跟著一齊炒。目前始作俑者同
幾位亂噏人士都已經被拉，但一眾四川概念股無啦啦就砸咗批蟹貨喺度。
　　成單嘢最瘋狂就係篇假料竟然係用ＡＩ生成，仲要入面創意無限，提到「成都要起聯合國總
部」、「首都遷移」以及係「迪士尼預留土地」等等。話係佢自己手寫作都仲算有啲心機，但居
然ＡＩ生成咁無誠意，但又衰在有人信又有人炒，一次過推升茶百道八成，實在係癲。不過今次
事件又再一次證明，而家嘅孖屐對消息係幾敏感，茶百道一嘢升上去嗰陣，可能有人連篇文都未
睇過就入市，結果即日炒即日吐，唔夠快手可能已經蟹咗。
　　茶百道業務正處於增長期，尤其南韓市場係目前孖屐最關注嘅增長點。據茶百道高麗國市場
負責人透露，目前茶百道喺當地本土消費者佔比已超八成，由最初主要係中國留學生幫襯，至今
已經完成本土化，有望成為茶飲股出海最佳例子，唔計呢幾日嘅走勢都已經跑贏同行奈雪
（０２１５０）唔少。但無端端茶百道急升回吐，搞到走勢「妖」味濃咗咁多，而且經過「假消
息之亂」後成地蟹貨等走人，後市走勢方面應該會波動唔少，難買咗啲。錯過今次炒作嘅朋友毋
須遺憾，買股票就似買奶茶，下一隻更精彩，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。