《魚缸博客》宜明今日落鑊炒，開咗逃生門就要快Ｄ走！

　　《魚缸博客》今日係黑色星期五（１３日），但勢估唔到港股成分股嘅升跌榜，居然少有地
出現「全國山河一片紅」奇景，恒指８２隻成分股曾經全部上升，不過百威亞太（０１８７６）
同長江基建（０１０３８）就唔係長紅，有時轉黑有時轉綠。雖然成分股普遍上升，但點升都唔
夠宜明昂科－Ｂ（０１５４１）升得咁勁，執筆呢刻，股價升緊５５％。
　　所謂「各有前因莫羡人！」唔係淨係睇到人地升，就以為係好嘢。查實宜明昂科今年來跌到
阿媽都認得，股價１月２日高見２９﹒８銀，到９月１１日低見３﹒２１銀，短短九個幾月，股
價唔見左近九成，並創上市新低。如果以舊年上市價１８﹒６銀計，低位都跌成８３％。即使股
價跌到咁低，但市值仲有１９億銀。如果以高峰期股價３２﹒５銀計，市值都成百億銀。由
３２﹒５銀跌至３﹒２１銀，一眾小散戶無咁上下心臟負荷能力，真係承受唔到。好彩大跌之後
有反彈，股價昨日升返１７％，今日再接再厲升一半。
　　今日股價之所以升咁多，無咩原因嘅。集團曾經發公告，話同美國公司就有關旗下產品簽訂
授權及合作協議，近期收取５００萬美元付款，至今合共已收取金額１５００萬美元。公司預計
未來將收取唔超過３５００萬美元餘下潛在付款，不過有關利好已經時隔一日，咩利好都消化晒
啦。
　　忽然有錢收，都勉強算一個股價上升理由嘅，事關公司上半年營收都係只得７７０００人仔
，除開一個月都係得萬二蚊人仔，遠低過香港打工仔收入中位數，真係慘過番工！不過初創公司
講心唔講金，超低營收唔代表一定無前景，需要啲時間咁囉，博客自問就無咁好耐性同信心喇。
　　不過，如果你當係「過大海」，又得閒睇實個市嘅話，其實跌到３銀附近，細細注都博得過
（而家低位升七成梗係唔好博！）呢隻股耐唔耐都會開一扇逃生門，炒作一日半日，例如之前３
月７日、８日，同８月２日。呢幾個日子都曾經大升，當然，收市升幾多甚至倒跌幾多，呢Ｄ就
好難講。所以，夠膽炒嘅人唔係淨係心口掛住個勇字就得，都要火眼金睛睇實個市。因為升市曇
花一現，一個唔覺意，隨時蘇州過後無艇搭！
《編者按》本欄搜羅即市傳聞，惟消息未經證實，《經濟通》亦不保證內容之準確性。