《小傳日記》近期風水好似興搞合併，神州呢邊有國泰君安（０２６１１）併購海通
（０６８３７），寄望可以做到神州「券商巨無霸」。而外圍呢幾日當然就係最關心「ＯＫ吞７
仔」，劇情發展到７仔母企Ｓｅｖｅｎ ＆ ｉ就正式拒絕Ｃｉｒｃｌｅ Ｋ母企
Ａｌｉｍｅｎｔａｔｉｏｎ Ｃｏｕｃｈｅ－Ｔａｒｄ（ＡＣＴ）嘅每股１４﹒８６美金要約，
但ＡＣＴ並未就此死心，一定要食硬７仔！
上個月中傳出「ＯＫ吞７仔」傳聞，８月１９號當日日經上市嘅Ｓｅｖｅｎ ＆ ｉ就「未
公布先興奮」，大升兩成二完場。而呢一次大升都著實係有啲蹺起咗ＡＣＴ，截至星期一
Ｓｅｖｅｎ ＆ ｉ每股飆到上２２００円，市值已經成４００億美元，已經高過ＡＣＴ提出嘅
大約３８５億美元要約價，都難怪Ｓｅｖｅｎ ＆ ｉ可以企硬唔受「購」。
Ｓｅｖｅｎ ＆ ｉ方面就話，ＡＣＴ出價唔夠高而且「充滿監管風險」，但就「願意真誠
地考慮任何符合股東和其他利益相關者最佳利益的提議」，亦會「抵制任何剝奪股東獲得公司內
在價值機會，或未能具體解決現實監管問題的提議」，即係拎多啲「誠意」先好嚟見我。
老實講如果兩大便利店合併成功，絕對係稱得上「便利店巨無霸」；全球有超過８﹒４萬間
７仔，而ＡＣＴ就有近１﹒７萬間便利店，合併成功就會喺全世界有超過１０萬間便利店，實現
世界級嘅「梗有一間喺左近」。
不過ＡＣＴ要「買起最大對手」呢一步一啲都唔易行，事實上ＡＣＴ市值都係大約５８０億
美金，只係比Ｓｅｖｅｎ ＆ ｉ高一啲，不相伯仲之下Ｓｅｖｅｎ ＆ ｉ確實係有話語權。
但ＡＣＴ都唔係善男信女，被請食檸檬之後就重申有意繼續收購，更加唔排除會「惡意收購」，
在商言商無謂做到咁難睇，目前都係「善意收購」嘅可能性大啲，不過上一次出價出手太低，難
免洩咗道氣。
近期興搞合併收購實則上都唔只係風水好，亦都同減息有關，減息有利股市，借錢收購成本
都一定會減低，於是就吸引ＡＣＴ呢個時候出手。但有評論認為７－１１都算係日本由本地出海
嘅國際企業，除咗Ｓｅｖｅｎ ＆ ｉ嘅擁有人伊藤家族，甚至到日本政府都有自己考量，應唔
應該容許外國資金加大喺日本企業嘅控制權，等等都係呢一場收購會牽涉嘅考量。
而實際上，７仔同ＯＫ喺北美一樣咁高市佔，合併成功後可能會引起美國反壟斷機構嘅審查
，呢一點就係Ｓｅｖｅｎ ＆ ｉ提到嘅「充滿監管風險」，明顯ＯＫ目前係未有相關嘅解決辦
法，亦係佢要繼續收購嘅必要考慮問題，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【香港好去處】etnet全新頻道盛大推出！全港最齊盛事活動資訊盡在掌握！► 即睇
