《魚缸博客》中廣核發盈警，股價最多跌兩成，博唔博得過？

　　《魚缸博客》港股今日係威係勢，恒指繼上星期五（１６日）大升３２０點後，今日再發力
，升超過２００點。而家升３００幾點就叫做大升？無法啦，近期股市偏弱，有得升已經唔錯。
睇返８月至今，單日升超過３００點嘅，暫時只得上星期五。所以，今時今日可以升３２０點已
經好難得喇。今早恒指再升２００幾點，合共有５００幾點，一眾散戶應該暫時可以笑返吓。博
客唯一擔心係，收市未必可以保持升２００幾點。
　　雖然今日恒指升得唔錯，不過，盤中亦不乏逆市大跌嘅股份，就好似中廣核（０１１６４）
咁，股價一度跌超過兩成。股價今早之所以跌咁多，只因集團發盈警，預料上半年溢利將較舊年
同期減少５０００萬至８０００萬銀。溢利跌咁多，集團半年即係賺幾多？通告無講，要自己去
查。
　　雖然通告格式和內容並無一定規限，但好多上市公司都做得好認真，除咗預期會賺多或賺少
幾多，又或者會蝕幾多之外；有時仲會講埋做多咗或做少咗幾多生意，甚至毛利有幾多等等，非
常仔細認真。一個唔覺意，真係會搞錯，當咗係正式業績。但中廣核除咗稅前溢利同溢利之外，
其他都欠奉。
　　睇返技術走勢圖，中廣核股價從２０２０年底不足３毫子，升到６月高位３﹒０９銀，股價
四年間升咗足足９倍。但集團４年來純利由２０２０年的１﹒５億銀升到２０２３年嘅４﹒９億
銀，升幅雖高達２倍，算係好標青。但比起期內股價升９倍，遠遠超過純利升幅，似乎有啲炒過
籠。
　　如果話４年時間太長，咁睇返今年３月低位１﹒４６銀，升到６月高位３﹒０９銀，不足三
個月都升咗一倍有多。股價升得咁急，點會唔趁勢碌返落去？今早股價最低去到１﹒５５銀，距
離３月低位１﹒４６銀不過一步之遙。如果股價之後掉頭上升，咁今日呢個低位同３月低位可以
視為短線雙底，或為進取投資者提供短炒機會，博股價回升返去１﹒９至２銀。不過，如果睇返
長少少，股價就算短期反彈，唔排除仍有回跌風險。所以，投資者要審慎衡量自己的風險承擔能
力。（ｖｓ）
　
《編者按》本欄搜羅即市傳聞，惟消息未經證實，《經濟通》亦不保證內容之準確性。