《小傳日記》同胞濕平免稅額升到萬二蚊！點解消費股反而咁消沉？

　　《小傳日記》阿爺又有筍嘢益香港，最新宣布提高同胞港澳購物免稅額至１２０００銀（人
仔．下同），連同口岸免稅嘅３０００銀人仔，最高可以掃貨１５０００銀都免稅。政府就話估
計今次提升免稅額措施可以為本地帶來８８億至１７６億嘅消費總額。
　　新措施將會喺７月１號實施，算係孖屐所期待嘅七一大禮包之一。相關嘅免稅額過去２８年
嚟都一路維持喺５０００銀人仔，時隔多年物價都已經升咗唔少，如今增幅成一倍有多都未算完
全趕上通脹，不過有都好過無。
　　但睇返今日本地消費股都反應冷淡，周大福（０１９２９）、六福（００５９０）都微跌收
場，ＰＲＡＤＡ（０１９１３）仲要跌２％，睇落利好作用可能真係未必可以即時反映到出嚟。
始終而家同胞來港都唔再係買買買，睇吓小紅書介紹邊度有咭打仲更加吸引，連麥當勞道都係觀
光名勝，廣東道反而無咩咭可以打。
　　而家同胞要買包包喺上面都有得買，並唔一定要落嚟買，反為打咭先係重點，政府亦都因而
推出好多大大件藝術裝置用嚟打咭。不過好多打咭藝術裝置都係免費進場，就算多人去，變現力
都唔高。其實捉緊同胞愛打咭呢一點的確係啱，但點樣將打咭熱潮變現先係搵錢要點，盲目推多
幾個點都係無乜用，如果可以創造一個先消費後打咭嘅點，咁就可以真正帶來收入。
　　目前神州經濟仍然恢復當中，同胞自然無高額消息意欲，夾硬想由奢侈品方面著手刺激消費
其實好有限，倒不如創造更多有長期價值兼變現能力高嘅打咭點先係上策，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。