《楠楠自語－莫灝楠》北上消費？

　　《楠楠自語》筆者放假期間偶然路過觀塘，平時餐廳都滿人，但假期入座率竟然僅僅得六成
左右，感覺商場人流都比平日少接近一半。
　
　　早前筆者曾經撰文《水往低處流》，指北上消費趨勢一旦形成，則絡繹不絕，除非香港消費
開始重現性價比，否則短期內難以逆轉。香港地產扼殺創意，透支經濟潛力，假設買串魚蛋１５
蚊，隨時有７至８蚊係攞嚟交租。一河之隔，樓上深圳一串魚蛋可能３至４蚊搞掂，咁畀你都上
去食啦！
　
　　買物業係睇回報，高租金「殺晒」啲商戶，無租金收入，業主需要減租吸租客，物業投資者
都會因為收益率太低而走貨，物業價格都會跌。
　
　　但呢個過程會非常漫長，你都要等啲所謂有實力，但其實係反應慢，依家都未覺得個市出問
題嘅業主肯止蝕，「打埋最後一口貨」出嚟，個市先會慢慢好番。到時個物業價格同個租金變番
正常，大家先開始會覺得唔痛。
　
　　如果你覺得香港地產市場依家有投資價值嘅，大可跟啲樓市博士、專家買樓買舖收租。可能
過幾年回首一望，原來Ｃａｓｐｅｒ盲目唱淡香港樓市，屆時歡迎大家笑我。如果樓市起死回生
，我都好想畀大家笑。
　
　　筆者見到香港咁，當然係唔開心，但呢件事唔會係你上ｆａｃｅｂｏｏｋ開個結業關注組、
呼籲大家留港消費就可以阻止嘅。長痛不如短痛，趕快跌完，比依家拖泥帶水好。地產市場回歸
理性，市場返去所謂嘅ｅｑｕｉｌｉｂｒｉｕｍ，香港才能重新出發。如果收入下降，甚至份工
都危危乎，仲要因為所謂嘅一份責任而喺香港捱貴貨、食貴嘢，你只係同自己荷包作對。
　
　　呢個可以話係一個「共業」，而不是助紂為虐，趨勢似乎不可逆轉，做自己便可。《南華金
融集團副總監　莫灝楠》
　
＊《經濟通》所刊的署名及╱或不署名文章，相關內容屬作者個人意見，並不代表《經濟通》立
場，《經濟通》所扮演的角色是提供一個自由言論平台。