《小傳日記》迪士尼新發明，ＶＲ滑行地板行唔停！

　　《小傳日記》元宇宙曾經係神州，以至係全球嘅科技同埋財經嘅焦點。不過「出道即顛峰」
，炒完一輪結果都係過咗氣，間間科企大佬都講明轉搞ＡＩ，元宇宙就放埋邊先。有人就話係「
元宇宙泡沫爆破」，不過科技一定係日新月異，只係唔當炒。搵唔到錢住就惟有交返畀有夢嘅人
去搞，近期迪士尼嘅幻想工程部就發明咗一款「Ｈｏｌｏ　Ｔｉｌｅ」，令到元宇宙嘅體驗更加
逼真。
　　身為繼華特迪士尼之後，第二位獲選入美國發明家名人堂嘅幻想工程師，Ｌａｎｎｙ　
Ｓｍｏｏｔ最新發布咗一款「Ｈｏｌｏ　Ｔｉｌｅ」，其實就係一塊由全方位移動地板，用家可
以喺上面全方向咁移動，慢慢行嘅話行去邊一邊都唔會偏離中心太遠，當戴住ＶＲ眼鏡喺上面行
，臨場感就可以大大提升。
　　其實喺Ｈｏｌｏ　Ｔｉｌｅ之前，ＶＲ世界已經有一款「萬向跑步機」，係一個鑊形底部嘅
裝置，底部向上延伸出一個圓形腰帶，用家要用腰帶固定身體，就算喺ＶＲ世界入面，點行都一
定感覺到有條腰帶困住自己。但係Ｈｏｌｏ　Ｔｉｌｅ就唔使固定裝置，真係可以自由自在咁行
。
　　有意見就覺得，Ｈｏｌｏ　Ｔｉｌｅ解決咗好大部分嘅戴ＶＲ暈嘅問題，因為用家喺
Ｈｏｌｏ　Ｔｉｌｅ上面嘅走動更加自由，減低咗視覺同身體嘅衝突，咁就可以令人更加沉浸喺
ＶＲ世界入面。
　　雖然近期元宇宙熱度大大降低，主要係因為ＣｈａｔＧＰＴ橫空出現之後，孖屐發覺ＡＩ嘅
先進程度已經可以做到融入日常生活入面，實用度亦都更加高，反而元宇宙喺價錢同實用性上都
未夠親民，寧願先將目光放喺現實。但其實ＡＩ之外，世界嘅元宇宙發展仍然喺鎂光燈之外繼續
進行，可能有一日又會出奇不意咁成為世界嘅焦點，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。