《小傳日記》中港股愈跌愈瘋狂，魚缸失完１６０００再失１５０００，前後都係得嗰五日
，五日就唔見逾１０００點，正好中國經歷緊廿四節氣嘅大寒，冷鋒過境，魚缸跌到人心都寒。
新年前孖屐仲憧憬緊過完一年會有新氣象，結果真係夠新，個市跌得更甘。魚缸深潛，Ａ場
更加直墮地底，孖屐普遍認為係外資大批沽貨所致，外資流出Ａ場規模可謂前所未見，反映外資
對於神州市場嘅恐懼亦都係創新紀錄，魚缸深插極都係未及Ａ場目前慘況。
開講有話股市最怕就係不明朗因素，ＡＨ股深插好大程度就係對於後市預期嘅不明朗。自監
管政策風吹起，中外投資者都意識到中港市場係受制於政策因素，孖屐因而興起炒消息，任何關
於股市嘅利好利淡消息都可以為股市帶來急升或者急跌。但係去到目前，正當孖屐正係等待緊刺
激政策出台，偏偏阿爺態度曖昧，遲遲未有實際措施，於是股市不進則退，無消息就係壞消息，
外資等到花兒也謝了，寧願止蝕都唔想再博反彈。
恒指收穿１５０００報１４９６１，已經創２０２２年１１月１號嘅收市低位，再下一個位
就係２０２２年１０月３１號所造嘅２０２２年低位１４５９７，但以今日低位１４７９４計，
距離都已經唔夠２００點。如果魚缸今次守得住１４５９７向上大幅反彈，勉強可以形成一個「
大雙底」，第一關博１８０００，再博上２２５００頸線位。當然呢個係最樂觀情況，２０２２
年嗰次反彈都係有時任國務院副總理劉鶴宣布「金融１６條」救市先帶動到大幅反彈，如今要再
有同等程度嘅消息，確實係非常之難。
外電報道近期國務院向多個地方政府同國有銀行發布指示，要推遲或暫停完成未夠一半嘅項
目建設，事涉１２個地區，包括遼寧、吉林、貴州等等，甚至係重慶。當市場亟待刺激之際，阿
爺都要叫停被視為救市最大水喉嘅基建項目，反映「救市」甚或「股市」已經唔係阿爺嘅主力，
反而「化債」先係首要主項，有錢都要先還地方債務。
目前魚缸先睇１４５９７，再下一個大位已經接近「海嘯位」，先睇１２５００。如果目前
情況延續，魚缸只可以靠低估值炒起，中線都好難完全排除再試「海嘯位」嘅機會，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【etnet 30周年】多重慶祝活動一浪接一浪，好禮連環賞！ ► 即睇詳情
