《小傳日記》神州近年鍾情短線遊，除咗踏遍大江南北，想出國又唔想太遠，同胞就會揀去
泰國。有見及此，中國同泰國就成功達成免簽證入境政策，泰國總理賽塔早幾日宣布咗中泰由今
年３月１號開始，將會實施永久互免簽證入境政策，往返兩國毋須對方國嘅簽證。
其實自上年９月開始，賽塔新上場無耐就積極推進兩地居民免簽入境措施，當時就開始實施
為期五個月的免簽政策。９月底第一批免簽中國遊客到達泰國，賽塔仲親自去到機場接機，曼谷
素萬那普機場仲掛起「中泰一家親，神奇泰國熱情依舊，永遠歡迎中國家人們」嘅橫額，真係「
泰溫情」。
唔止港人鍾意去泰國，據講泰國方面都非常依靠中國遊客，疫情前２０１９年，泰國全年入
境中國遊客１１００萬人次，佔海外遊客總數嘅四分之一，所以點解賽塔要爭取同中國達成免簽
入境。咁著緊靠中國遊客刺激經濟，皆因賽塔係總理同時兼任財政部長，而且本身就係地產大亨
，上年３月先正式開始從政兼爭做總理，上位坐正之後自然更加著重經濟同搵錢，可以預計未來
泰國應該會有更加多嘅刺激經濟措施。
孖屐方面都相當睇好今次措施，自１月２號政策落地以來，魚缸有唔少旅遊相關股份都落鑊
，其中隻飛揚集團（０１９０１）連炒三日，累積升足三成六。飛揚其實係一間位於寧波嘅旅行
社，短中長線都有，其中官網入面去泰國嘅團可以搵到有２６條線，有大團小團包團，仲有得揀
半自遊行，都算多選擇，不過如果要搵去日本嘅團，喺飛揚網站就可以搵到６９團，仲多過泰國
團。所以雖然飛揚借中泰免簽消息炒起，不過都其實係一隻旅遊股，並唔係集中做泰國團，業績
都無標明泰國團係公司賺錢主力，而呢幾日炒起前都連跌咗四個月，可能今次都只係借勢反彈，
請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
《說說心理話》從心理學角度看成癮：點解沉迷？點樣算上癮？一個關鍵指標！邊類人最難以自拔？► 即睇
