《小傳日記》年尾流流車企輪流減價，偏偏小米（０１８１０）就喺呢個時候鬧哄哄，皆因
小米第一架車終於有圖有真相。
工信部發布《道路機動車輛生產企業及產品公告》（第３７７批）中入面就見到兩架小米旗
下新車，兩款純電動轎車分別係ＳＵ７和ＳＵ７ Ｍａｘ，係由北汽負責申請生產批准，但車尾
雞乸咁大寫著「ＸＩＡＯＭＩ」就肯定係小米車。
以功率計會分為電機功率峰值會有２２０ＫＷ同２７５ＫＷ，但係型號方面就有ＳＵ７、
ＳＵ７ Ｐｒｏ ╱ Ｍａｘ，可能係功率相同但係外觀上有唔同。兩款車分別用咗唔同電池，
包括比亞迪（０１２１１）旗下弗迪電池嘅磷酸鐵鋰電池，同另一款就用咗及寧德時代三元鋰電
池。成個外觀整體都好流線型，至少比起理想（０２０１５）以大架實用為主大笨象車型輕盈得
多，據講係由前ＢＭＷ ｉＸ嘅主設計師操刀。
喺央視節目入面，小米創辦人雷軍就提到，小米第一架車用咗３４００個工程師，研發投入
過百億人仔。使咗咁多錢，雷軍表示「肯定有預期」，但係汽車呢樣好「玄」，擔心無人買，又
擔心太多人買開發唔切。
不過小米開發車都咁多年，一路由傳聞愈傳愈真，到今日終於有圖有真相，都好唔容易。花
咗咁多時間，又有做手機咁耐以來嘅研發基礎，自然比起其他新公司有更大嘅機會成功。而事實
都證明孖屐睇好小米造車同背後嘅生態圈，股價企穩喺１５至１６銀，都係對小米投下信心一票
。而家有傳ＳＵ７將會下個月起量產，最快２月就開賣，即管睇吓賣成點，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
想要獨家投資理財Tips？即Like etnet 全新Facebook專頁► 立即讚好
