《小傳日記》馬雲耕田耕出成果！點解預製菜市場唔可以錯過？

　　《小傳日記》早排巴巴（０９９８８）出完成績表之後，雖然有首派出中期息加持，但係阿
里雲同盒馬嘅分拆就食詐胡，令孖屐大失所望。
　　不過今日（２４日）就有報道摷到，杭州馬家廚房食品有限公司正式成立，係由馬雲間接全
資持有，註冊資本１０００萬銀人仔。報道話馬家廚房嘅經營範圍包括食品銷售（僅銷售預包裝
食品）、食品互聯網銷售（僅銷售預包裝食品）、食用農產品初步加工、食用農產品批發同食用
農產品零售等等，馬雲研究農產品呢兩年終於有成果見到。
　　神州主力發展科技產業多年，孖屐普遍都覺得農業唔會係目前神州市場嘅金蛋。單睇農業好
似差咁啲，但係魚缸都見識過東方甄選（０１７９７）係點樣由直播補習變成農產品帶貨，到而
家已經全力向上電商進發，證明識扭橋就連耕田都可以出頭。
　　馬雲歸隱田園呢兩年都唔係不作為，如今以生產預製菜來發展農業都未嘗唔係好橋。發展農
業對阿爺來講係具有戰略意義，一來可以解決落後國家嘅糧食危機，二來亦都可以為國家嘅糧食
儲備做好準備，預防物價上升時要面對嘅狀況，更加係國際關係可以用到嘅籌碼，所以一套好嘅
農業系統係有長遠嘅戰略意義。
　　如今馬雲布局預製菜，將農產品先行加工成為可食用狀態，再延長保存期，完全係正中解決
糧食危機嘅一個方法。處理超長遠問題嘅同時，如今一線城市發展蓬勃，好多城市人都趕唔切準
備三餐，甚至要食「白人餐」之類嘅簡便午餐，預製菜正好解決呢個缺口。未來馬家廚房預製菜
量產之後，再經淘寶天貓或者盒馬銷售，可以話係一條龍由原材料、加工、銷售包辦曬，完全不
經外人，可以話係供應鏈之中嘅垂直整合，更加完善巴巴嘅生產體系。
　　之所以為好橋，既解決阿爺長遠嘅擔心，又可以喺而家嘅事情具有發展潛力，馬雲呢兩年都
唔係活得無意義，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。