《小傳日記》７０億人仔研發開支！小米車最大賣點你知唔知？

　　《小傳日記》雖然美國已經進入放假ｍｏｏｄ，不過內房白名單炒得咁高興，令準備放假嘅
外資都忍唔住手要出手掃些少內房，長揸唔到都可以當短炒。
　　不過之前抽升嘅小米（０１８１０）近期有見頂味道，１７銀過唔到，但係１５銀好似又有
啲力水，即管睇多兩日。查實呢兩個月炒小米都係炒造車，由電話龍頭變成造車新勢力，小米都
掙扎咗好耐。近期有報道就統計咗，小米直到第一架車量產之前，至今至少投入７０億人仔研發
資金。而小米嘅一眾「師兄」可能因為早入市，研發資金嘅投入規模相對細一啲，例如蔚來
（０９８６６）就係大約５５﹒３億人仔，小鵬（０９８６８）甚至只係３７﹒５億人仔，唔知
係通脹令到小米要畀多啲，定真係小米肯花多啲心機。
　　據講小米第一架車屬於中至大型嘅轎跑，比起現家最興嘅大隻ＳＵＶ，轎跑車型比較流線形
，所以車櫳來講係會比ＳＵＶ細啲，不過外型就會型仔啲，可能就係專登避開同現有車型正面競
爭。
　　而小米過往都係以平價策略殺出一條血路，但喺印度開始做唔住之後，就唯有轉為高端化策
略。如今電動車市場咩價位嘅車都有，小米車嘅定價都好關鍵。太貴不如買Ｔｅｓｌａ，太平都
仲有好多選擇，小米未來最重要就係ｓｅｌｌ到點解非買小米車不可。
　　小米車最大特色就係「車＋手機」，手機可以點樣配合到揸車，甚至係生活，係大眾肯唔肯
畀錢買小米車嘅最大誘因，如果令人覺得「車＋手機」係小米做得最好，咁小米就有好大嘅叫價
空間。孖屐可能會期待喺小米車入面，可能已經可以控制到屋企隻小愛同學開定冷氣，又或者係
調返轉，總知就係呢種聯動，甚至係「車＋手機＋家居」，如果小米可以實現到，相信就可以為
小米帶來更加好嘅前景，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。