《小傳日記》微短劇熱潮崛起，換轉香江又搞唔搞得起？

　　《小傳日記》早排微信、抖音同快手（０１０２４）接連出手整治短劇，主力打擊涉嫌色情
低俗、血腥暴力、不良價值觀等等嘅違規內容，單係微信近期就處置咗違規微短劇１１４套、嚴
重違規發布微短劇的小程序帳號１６３個。
　　微短劇係今年中開始興起，其實都係由抖音式短視頻衍生出來。之前短視頻多數都係一啲搶
眼嘅內容，多數都可以歸類為綜藝類型為多，又或者最方便就係電影剪輯。而基於「搶眼」同「
故事性」，唔想抄一套電影不如就索性自己寫個劇本來拍，微短劇就係咁樣誕生出來。
　　微短劇比起普遍短視頻再多一重故事性喺入面，令人不知不覺就會入咗去睇，係真正嘅沉浸
式體驗。而短視頻如果要留住眼球，通常頭三句就已經要吸引到人，而微短劇為咗吸引觀眾，都
一樣頭三句就已經令人唔捨得碌走。好似抖音紅爆嘅微短劇《二十九》，第一集嘅頭幾秒已經出
現老套嘅捉姦現場，不過橋唔怕舊，一見到個大婆入門口發現老公出軌，就會好想睇落去佢會有
咩狗血反應，咁就可以把握到呢頭幾秒去留住觀眾。
　　微短劇通常每集都係幾分鐘，劇情唔會太花巧，簡單易明易追，又係大眾最鍾意嘅題材，睇
一集都係幾分鐘，同淥杯麵差唔多，用來送飯最啱，所以神州網民就稱之為「電子榨菜」。而微
短劇平台都識搵錢，頭幾集唔使錢，開始入戲肉就收錢，其中快手旗下「快手星芒」出咗８５套
微短劇，有２１套都播放量破億，招商收入按季大升１０倍。
　　不過香港網絡平台暫時都未係好興呢種微短劇，就算而家開始多咗人拍ＩＧ　ｒｅｅｌｓ，
都未形成大熱嘅現象，如果有貼地嘅作品出現，相信香港都唔係無發展微短劇嘅潛力，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。