《小傳日記》多鏡頭就影得靚？ｉＰｈｏｎｅ　１６傳有六粒鏡！

　　《小傳日記》魚缸連升六日！幾耐無見到咁嘅境況，仲係自９月２２號以來第一日重上
１０００億銀成交，真係可喜可賀。
　　魚缸咁升法，低殘股之一嘅舜宇（０２３８２），早排跌到落５０﹒３銀６年半新低之後，
終於行過死蔭嘅幽谷反彈，今朝仲高開８巴仙。原來最新公布９月手機鏡頭出貨量按年升咗一成
七，車載鏡頭出貨量就多７巴仙有多。不過近期蘋果概念股飆得好勁，好似隻丘鈦
（０１４７８）噚日就升咗兩成三，今日隻富智康（０２０３８）就最多升過三成有多，唔通蘋
果有咩新嘢？
　　ｉＰｈｏｎｅ　１５都開賣咗好一排，但係到呢兩三日先忽然炒起蘋果概念股，唔知又係咪
同新傳緊嘅ｉＰｈｏｎｅ　１６有關呢？科技世界一樣都係貪新忘舊，當然都要「新」好過舊先
啦，如果新不如舊就真係嘥氣。不過而家就傳緊，出年登場嘅ｉＰｈｏｎｅ　１６，有可能係史
上最大ｍｏｎ嘅一部，最大部嘅Ｐｒｏ　Ｍａｘ可能會有成６﹒９吋咁大！
　　不過Ｐｒｏ　Ｍａｘ係咪仲係叫「Ｐｒｏ　Ｍａｘ」都未知，因為又有傳ｉＰｈｏｎｅ　
１６最高規格嗰款機會係叫「Ｕｌｔｒａ」，不過係Ｐｒｏ　Ｍａｘ改叫「Ｕｌｔｒａ」，定係
喺Ｐｒｏ　Ｍａｘ之上再有一部Ｕｌｔｒａ都係未知。關於Ｐｒｏ　Ｍａｘ嘅傳聞真係多到飛天
，仲有講話１６　Ｐｒｏ　Ｍａｘ會變成「鏡頭魔人」，喺而家三個鏡頭嘅側邊仲會多加３個小
鏡頭，一共６個鏡頭！都唔知影唔影到咁多，不過可能就係呢個原因而炒起舜宇！
　　不過距離新機ｉＰｈｏｎｅ　１６就仲有成年，今年ｉＰｈｏｎｅ　１５銷量好係因為早兩
年少人換機，講白啲都係低基數效應，６個鏡頭係咪真係吸引到人一年換機，都仲要睇吓係咪真
係性能勁好多先得，請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。