《小傳日記》蔚來（０９８６６）呢幾日動作多多，用一啖砂糖一啖屎來形容就最適合。早
兩日忽然間公布要出可轉債，嚇到美國嗰邊擔心佢會好似啲內房咁資不抵債，結果ＡＤＳ要大冧
一成七。點知今日又再有猛料，就係正式公布旗下第一款手機。
今朝蔚來搞咗個創新科技日，老闆李斌就好似Ｓｔｅｖｅ Ｊｏｂｓ咁企喺個大屏幕前演講
，期間就正式發布旗艦智慧型手機ＮＩＯ Ｐｈｏｎｅ。而李斌亦都鬼拍後尾枕，解釋造電話「
肯定不是因為手機公司都在造車，也不是因為蔚來現在汽車不賺錢，要去靠手機盈利」。而家個
世代都好有趣，小米（０１８１０）同舜宇（０２３８２）爭住入車市，蔚來就想出電話，不過
就都唔肯認係因為本業唔夠賺。
李斌就話，造電話係因為想有一部電話係可以同蔚來旗下嘅車無縫連接，想做一部手機係可
以令啲車更加好用。即係係為咗車先手造機，不過又會喺正下半年呢個新機高峰期來發布，真係
無心想爭一日長短？
硬件方面，ＮＩＯ Ｐｈｏｎｅ用Ｓｎａｐｄｒａｇｏｎ ８ Ｇｅｎ ２作為處理器，而
之前就傳緊小米１４將會用到Ｓｎａｐｄｒａｇｏｎ ８ Ｇｅｎ ３。容量方面以１２ＧＢ＋
５１２ＧＢ為基礎，會係「性能版」，另外仲有「旗艦版」同「ＥＰｅｄｉｔｉｏｎ」，最大容
量可以去到１６ＧＢ＋１ＴＢ。屏幕係２Ｋ解析度的６﹒８１吋曲面屏，主鏡頭５０００萬像素
，電池５２００ｍＡｈ，配備６６Ｗ有線及５０Ｗ無線快叉。
上述都只係基本手機條件，而ＮＩＯ Ｐｈｏｎｅ最需要嘅就係同車嘅完美配合。首先就係
ＮＩＯ Ｐｈｏｎｅ可以直接當車匙咁用，而且內置ＮＩＯ Ｌｉｎｋ車控鍵，可一鍵直達３０
項互聯功能，包括快速查看車輛狀態、停泊位置，完成車輛解鎖落鎖，落窗升窗等等，就算喺無
網狀態之下，都可以做到解鎖、閃光燈鳴笛等等功能。至於喺車入面，都可以透過車裏面嘅螢幕
連接到ＮＩＯ Ｐｈｏｎｅ，李斌話：「視窗不是簡單的投屏，這兩個螢幕可以平行運行不同的
程序，這是很不一樣的」。
雖然蔚來實牙實齒話只係想造一部令架車更好用嘅電話，不過整得出嚟又「豈止如此」？可
能今次都只係試水溫，蔚來嘅未來仲喺後面，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】畢加索的市場潛能有多強？亞洲收藏家如何從新角度鑑賞？► 即睇
