《小傳日記》上個星期五（１號）因為超強颱風蘇拉打到嚟而要停市一日，香港「難得」有
一年要延遲開學日，學生哥又多咗一日假，可以趕埋啲暑期功課。不過時隔一星期，以為無料到
打唔成風嘅海葵，居然一個屈尾十為香港帶來又急又勁嘅暴雨，仲令香港第一次因為黑雨而停市
，令香港一個星期左右時間已經停咗市兩日。
回顧返噚日全日日間都無乜雨，只係有啲翳焗，同間唔時有幾滴毛毛雨，仲有好多人食晏都
無帶遮，直到放工時間都只係毛毛雨。不過一入黑就開始嚟料，７點幾８點忽然開始倒水咁，仲
要係又急又密，７點４５分天文台就先後發出局部地區大雨提示及新界北部水浸特別報告。再去
到９點２５分，天文台發出黃色暴雨警告，點知唔夠半個鐘，到９點５０分就要改發紅色暴雨警
告，可想而知呢場雨來得又急又密。
結果到噚晚１１點０５分，天文台終於發出今年第一個黑色暴雨警告，之後雨勢繼續加劇，
去到午夜１２點，天文台總部錄得有史以來最高紀錄嘅一小時雨量，達到１５８﹒１毫米。今次
黑雨仲創下多個紀錄，除咗有史以來最高紀錄嘅一小時雨量，亦都係香港至今發放時間最長嘅黑
雨，到今日兩點半已經發放超過１５個鐘頭，而魚缸亦都第一次因為黑雨而需要全日停市。
午夜黑雨期間，政府已經宣布將會喺朝早６點前公布須唔須要停工停課，最終就喺今朝５點
３５分宣布所有日校停課，又「呼籲」僱主應該參考八號風球下嘅工作安排，「採納情理兼備及
具彈性的工作安排」，同時宣布「極端情況」會至少維持至中午（截至兩點半前已宣布至少維持
至下午６點）。
相信今次政府宣布入面最特別就係用咗「極端情況」。以往打風都會講明「八號信號」會維
持至幾時，不過今次就無講明係「黑色暴雨」，只係用「極端情況」。雖然呢個新ｔｅｒｍ未係
好清楚講明即係乜嘢情況，但係自從山竹一役，就知落波都唔等如危險解除，相關嘅後續影響仲
存在，如果一時要全世界即時返工返學反而仲引起災難級嘅癱瘓。而今日晏晝後雨量經已收細，
但係黑雨繼續維持，政府亦宣布維持「極端情況」，以目前觀察推斷，「極端情況」維持就等於
停課同停工「呼籲」繼續維持。比起強行因為雨量收細而取消黑雨，咁嘅做法就避免咗好多尷尬
情況出現，請請！
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。
【與拍賣官看藝術】收藏界遺珠？超現實主義藝術家林飛龍注入拉美元素！► 即睇
