《小傳日記》李玟錄音重挫星空華文，中國．好聲．陰！

　　《小傳日記》被喻為「華語樂壇天后」嘅李玟（ＣｏＣｏ）喺今年７月初不幸離世，令全球
粉絲心痛。人雖已去，但圍繞住佢過往擔當內地一個歌唱比賽節目－《中國好聲音》評委時所遭
遇到嘅，同埋佢見到嘅不公義，就好似早排發生喺夏威夷嘅火災咁，喺各大小傳媒猛烈燃燒！詳
細內容我就唔講喇，大家上網就可以揾到。
　　被爆「黑材料」後，隻星空華文（０６６９８）連續兩日暴跌，上星期五以１２４銀開市，
最高見１２４﹒５銀，收報９４﹒５銀，大跌近兩成四。今日繼續受壓，以９３銀最高位開出後
，一度低見６４﹒５５銀，又唔見咗三成！下午開市後都仲跌緊超過２７％。
　　其實我想帶出一點，唔好以為買股票淨係睇住個數字就夠，仲要了解公司背景、做緊咩生意
。隻星空華文主要在內地從事綜藝節目、音樂、劇集及電影的知識產權（ＩＰ）運營及授權，同
埋其他ＩＰ相關業務，亦係《中國好聲音》嘅母企，但香港有幾多投資者會留意到相關新聞？唔
好話有無睇過《中國好聲音》，尤其老一輩嘅投資者，《中國好聲音》，咩嚟㗎？
　　有內地網民話呢隻股票一文不值，起碼要跌九成，有個就話《中國好聲音》概念快結束。娛
樂圈被喻為「大染缸」，依家更加複雜，投資相關股票自然要留意多啲。《中國．好聲．陰》呀
！請請！
　
＊編者按：本欄搜羅即日熱門傳聞，惟消息未經證實，《經濟通》亦不保證內容之準確性；本文
只供參考之用，並不構成要約、招攬或邀請、誘使、任何不論種類或形式之申述或訂立任何建議
及推薦，讀者務請運用個人獨立思考能力自行作出投資決定，如因相關建議招致損失，概與《經
濟通》、編者及作者無關。