《小傳日記》數數手指,米字國上星期五(24日)決定「脫歐」,到今日為止都唔夠一星
期,但係不論歐美魚缸,定係香江呢邊,都好似已經走出咗「脫歐」恐慌,噚晚(29日)道指
又輕鬆收復284點報17694,歐洲三大魚缸更走前2至近4巴仙,缸友不禁問:係咪真係
無事架……?
老老實實,小傳就覺得唔好太過坐定粒六,米字國都仲未開始同歐盟國家傾數,之後會點發
展都無人知。香江呢幾日叨光彈高,今日(30日)恆指最高升近400點至20828,收復
埋廿天(20641)及五十天線(約20562)。不過,下晝歐洲開市腳軟,恆指即時嚇一
嚇。好彩最後虛驚一場,大市埋單收升358點收20794,國指踢高141點報8712,
成交逾725億銀,開心迎接一連三日嘅回歸假期!
總結呢個月表現,經歷A場三度入摩失敗,同埋米字國爆冷脫歐之後,恆指都能站穩住腳,
只係比5月跌咗20點,成功同「六絕」Say Goodbye!
*領展嗌唞唞港鐵升不休,樓價指數好磚頭跳跳舞*
魚缸今日生猛返晒,唔少走去避難嘅資金出返晒嚟。領展(00823)今朝試過高見
54﹒25銀上市新高,但臨尾要倒逾2巴仙收52﹒8銀。中電(00002)同樣走唔甩,
股價破頂後倒跌,跣低唔夠半巴仙,收報79銀,兩者包辦最差藍戰士。至於港鐵
(00066)就好好多,有逾1巴仙收穫,收報39﹒2銀,繼續破頂。
香江私人磚頭售價指數連升兩個月,報275﹒5點。地產佬聽到都心花怒放,長實地產
(01113)踢高近2巴仙,收報48﹒4銀。恆地(00012)同新地(00016)就
齊齊企高逾2巴仙,收報43﹒55銀及93﹒05銀。
*瑞士佬護航友邦氣勢旺,長和再上躍油佬亦唔弱*
自從米字國脫歐之後,連跌咗三日嘅友邦(01299)呢兩日發力狂升,由於喺瑞士佬瑞
信護航之下,今日一口氣飛越十天線(45﹒13銀)同廿天線(45﹒407銀),埋單踢起
逾3巴仙,報46﹒35銀,勁!
噚日始見反彈嘅超人一號(00001)有消息傳出,指喺歐洲併購VimpelCom又
作讓步。另一方面,早前長和收購O2受阻撓之後,家陣O2母公司已經放棄分拆O2上市,唔
知會唔會食回頭草,再賣畀超人呢?不過超人一號就已經好畀力,再踢起2巴仙,報84﹒55
銀。長建(01038)同電能(00006)亦都飛起近2巴仙同近4巴仙,喺汕頭會見廣東
省省長嘅嘉誠哥唔知會唔會笑逐顏開?
孖屐氣氛見好轉之下,油價表現亦都唔弱,布蘭特8月期油收漲4巴仙,令到油佬起舞,中
海油(00883)、中石化(00386)、中石油(00857)分別浮起2至3巴仙。
*整合進展佳中海外好high,華潤撐萬科齊齊笑呵呵*
上海再現地王,奉賢區地塊以逾17億銀人仔,發展商圍皮可能要賣到每平方米5﹒6萬銀
人仔。同業咁睇好後市,難怪今日神州磚頭全部扯高。其中,中海外(00688)指同中信股
份(00267)物業資產整合工作進展順利,中海外同時獲大摩重申「加碼」,股價隨即掟高
逾6巴仙,收報24﹒5銀,成最佳藍戰士。中信股份就進帳近3巴仙,收報11﹒28銀。其
他街坊,好似碧桂園(02007)及恆大地產(03333)亦有近1至3巴仙升幅。
華潤集團發聲明指唔同意寶能系提出炒晒所有萬科(02202)董事及監事嘅提議。喺主
要股東支持下,萬科急急腳走高逾4巴仙,收報15﹒2銀。華潤置地(01109)亦揚近5
巴仙,收報18﹒1元。
*行使換股債阿里撐銀泰,隆成玩財技沽壓好難避*
阿里巴巴宣布悉數轉換銀泰商業(01833)所有嘅尚未轉換可換股債券,換股價係
7﹒1309銀,較上日收市價溢價足足近兩成!公司今日踢起7巴仙,報6﹒42銀,現價仲
係低過換股價呀!
不過要數升幅,銀泰商業就唔夠中國基建港口(08233)咁犀利啦。公司宣布,以代價
4715萬人仔,向湖北政府收購一個碼頭項目六成權益,以內部資源撥付,話可以配合「一帶
一路」咁話!結果股價踢起25巴仙,報1﹒87銀,創上市以來新高!
呢個世界有人歡喜總有人愁,有大升魚仔自然有大跌嘅魚仔,好似隆成(01225)咁,
打算五合一後一供二,咁複雜嘅財技,點會唔嚇怕缸友?今日就唔見逾38巴仙,報0﹒068
銀,成為跌幅最大魚仔!涉及財技嘅公司少掂為妙,早兩日紅股除權嘅美捷匯(01389)今
日大成交跣低近29巴仙,報1﹒89銀,希望缸友走得切啦!假期愉快,請請!
《編者按》本欄搜羅即日熱門傳聞,惟消息未經證實,《經濟通》亦不保證內容之準確性
本文只供參考之用,並不構成要約、招攬或邀請、誘使、任何不論種類或形式
之申述或訂立任何建議及推薦,讀者務請運用個人獨立思考能力自行作出投資
決定,如因相關建議招致損失,概與《經濟通》、編者及作者無涉。
想要獨家投資理財Tips?即Like etnet 全新Facebook專頁► 立即讚好