又到業績期,作為果鏈中堅力量嘅瑞聲科技(02018),喺蘋果大中華區銷售走樣嘅情況下,無諗到成績又幾理想,大行爭住派心心,一片唱好聲中瑞聲今朝再升6%,回到一個半月前高位。
瑞聲科技上半年收入都增長咗22個巴仙,符合外界預期,不過期內純利就高達5.37億人仔,按年爆升2.57倍,換言之,公司產品毛利率高咗,盈利能力強咗,證明公司唔怕轉型,最緊要轉得夠型。
睇番各個業務分部,外界最關心係公司喺今年2月收購咗八成股權嘅高端音響系統供應商Premium Sound Solutions(PSS),乘住電動車大趨勢發展車載音響市場,而PSS的確交出成績,併表收入達到15.2億人仔,毛利率25巴仙,顯著高於公司整體毛利率嘅21.5巴仙;至於整體聲學業務,公司收入實現34.6億人仔,增長只得4.1巴仙,勝在毛利率夠高,達到29.9巴仙。
光學業務勢頭都不俗,收入22.1億人仔大增24.9巴仙,主要由於智能手機光學行業需求復甦,以及集團在中高規格市場份額提升帶來的更高出貨量同單價改善。
高盛研報就話,對公司保持樂觀態度,預計其未來表現將進一步改善,主要由於正在改善的手機鏡頭規模及像素組合升級。
不過唔講都唔知,瑞聲科技嘅最大幻想空間,竟然係來自平平無奇嘅咪高峰!事關全世界擁抱AI,要同手機、電視甚至其他傢俬電器做到智能語音交互,就離唔開一支靚咪,公司管理層好自豪咁話,瑞聲作為行業中最早布局高信噪比麥克風並實現大規模量產嘅玩家之一,未來有望乘AI東風繼續創造可觀增量。
大行對瑞聲抱期待,目標價大概喺34銀至42銀之間,從技術上睇,瑞聲已經遠遠拋離各條平均線,跟住嘅阻力位就係上個高位34.6銀,期待一嘢突破埋,上40銀挑戰唔大,50銀左右都有機會上試。
《編者按》本欄搜羅即市傳聞,惟消息未經證實,《經濟通》亦不保證內容之準確性。
《說說心理話》【奧運劍擊熱】大師兄張小倫親身分享!贏在起跑線=壓力?如何培育子女有卓越成就?► 即睇